തൃശൂർ: തൃശൂരിൽ എംഡിഎംഎയുമായി 27 കാരൻ അറസ്റ്റിൽ. തൃശൂർ പീച്ചി സ്വദേശി ശിവം കോലിയെയാണ് എക്സൈസ് സംഘം അറസ്റ്റ് ചെയ്തത്. ജില്ലയിൽ വ്യാപകമായി മയക്കുമരുന്ന് വിപണനം നടത്തുന്നവരെയും കുട്ടികൾക്കിടയിൽ മയക്കുമരുന്ന് വിപണനം നടത്തുന്നവരെയും കണ്ടെത്തുന്ന ഓപ്പറേഷൻ ഹോട്ട്സ്പോട്ടിന്റെ ഭാഗമായി രാത്രി സമയങ്ങളിൽ നടത്തിയ മിന്നൽ റെയ്ഡിൽ പ്രതി കുടുങ്ങുകയായിരുന്നു.
റെയ്ഡ് സമയത്ത് ഉദ്യോഗസ്ഥരെ തള്ളി മാറ്റി രക്ഷപ്പെടാൻ ശ്രമിച്ച ഇയാളെ എക്സൈസ് സംഘം വളഞ്ഞ് പിടികൂടുകയായിരുന്നു. പ്രതി വിൽപ്പന നടത്തിയ മയക്കുമരുന്ന് വാങ്ങിയ യുവാക്കളെയും ഓപ്പറേഷൻ ഹോട്ട്സ്പോട്ടിന്റെ ഭാഗമായി എക്സൈസ് സംഘം അറസ്റ്റ് ചെയ്തിട്ടുണ്ട്.
മാരകമായ സിന്തറ്റിക് ലഹരി വസ്തുക്കൾ ജില്ലയിലെ വിവിധയിടങ്ങളിൽ വ്യാപകമായി വിറ്റഴിക്കപ്പെടുന്നുണ്ടെന്നും ലഹരിവസ്തുക്കളുടെ ഉപയോഗം കൂടിയെന്നും തൃശൂർ ഇന്റലിജൻസാണ് എക്സൈസ് സംഘത്തിന് വിവരം നൽകിയത്. ഇതിന്റെ അടിസ്ഥാനത്തിലാണ് തൃശൂർ റേഞ്ച് എക്സൈസ് ഇൻസപെക്ടർ അബ്ദുൾ അഷ്റഫും സംഘവും ചേർന്ന് റെയ്ഡ് നടത്തി പ്രതിയെ വലയിൽ വീഴ്ത്തിയത്.
ശിവം കോലിക്കെതിരെ മുൻപും മയക്കുമരുന്ന് കേസുകൾ നിലവിലുണ്ട്. അന്വേഷണത്തിൽ കണ്ണാറ, ചേരുംകുഴി, കാളക്കുന്ന് മേഖലകളിലെ പ്രധാന മയക്കുമരുന്ന് വിതരണക്കാരനാണെന്ന് കണ്ടെത്തിയിട്ടുണ്ട്. ഇയാൾക്ക് മയക്കുമരുന്ന് നൽകുന്ന വലിയ സംഘം പിന്നിലുണ്ട്. ഇയാൾ അവർക്ക് വേണ്ടി കാരിയറായി പ്രവർത്തിക്കുന്നതായും വിവരം ലഭിച്ചിട്ടുണ്ടെന്നും എക്സൈസ് വ്യക്തമാക്കി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
