മൺസൂൺ എത്തി! ഇനി സാഹസമല്ല, ജാഗ്രതയാണ് വേണ്ടത്; മഴക്കാലത്ത് വാഹനമോടിക്കുമ്പോൾ..

വേനലിന് വിരാമമിട്ട് മഴ ഇങ്ങെത്തി. ഇപ്പോൾ മഴ രസമായി തോന്നുമെങ്കിലും കുറച്ച് കഴിഞ്ഞ് സ്ഥിതി ഇതായിരിക്കില്ല. വൻ പ്രളയത്തെ അതിജീവിച്ച് വന്നിട്ട് അധിക നാളുകൾ ആയിട്ടില്ല. കുറച്ച് ദിവസം നിർത്താതെ മഴ പെയ്താൽ തീരാവുന്നതാണ് നമ്മുടെയൊക്കെ സമാധാനം. മഴയെ ചെറുത്ത് നിർത്താൻ കഴിയാത്തതിനാൽ തന്നെ ജാഗ്രത പാലിക്കുകയാണ് ആവശ്യം.

അതീവ ശ്രദ്ധയോടെ വേണം മൺസൂൺ കാലത്ത് വാഹനം ഓടിക്കാൻ. മൺസൂണിൽ വെള്ളക്കെട്ടിലൂടെ വാഹനം ഓടിക്കുന്നത് കഴിവതും ഒഴിവാക്കണം. അത്തരം പ്രദേശങ്ങളിൽ വെള്ളക്കെട്ടിന്റെ വ്യാപ്തി എത്രയാണെന്ന് തിരിച്ചറിയാൻ കഴിയത്തത് കൊണ്ടാണ് ഡ്രൈവിംഗ് ഒഴിവാക്കണമെന്ന് പറയുന്നത്. അഥവാ വാഹനം വെള്ളക്കെട്ടിലൂടെ ഓടിക്കേണ്ടി വന്നാൽ തന്നെ വണ്ടി സ്തംഭിച്ചാൽ ഒരിക്കലും എഞ്ചിൻ സ്റ്റാർട്ട് ചെയ്യാൻ ശ്രമിക്കരുത്. അങ്ങനെ ചെയ്താൽ അത് എഞ്ചിനിൽ വെള്ളം കയറി ഗുരുതരമായ കേടുപാടുകൾകളിലേക്ക് നയിക്കാം.

അപരിചിതമായ റോഡുകൾ ഒഴിവാക്കി പരിചയമുള്ള റോഡുകളിലൂടെയാകണം മഴക്കാലത്ത് യാത്ര. അപകടങ്ങളെ ഒഴിവാക്കാൻ ഒരുപരിധി വരെ ഇത് ഉപകാരപ്പെടും. വെള്ളം കയറിയാൽ റോഡിന്റെ യഥാർത്ഥ അവസ്ഥ മനസിലാക്കാൻ സാധിക്കില്ല. സമുദ്രനിരപ്പിൽ നിന്ന് താഴ്ന്ന പ്രദേശത്തൂടെയുള്ള അപരിചിതമായ റോഡുകളിലൂടെ പോയാൽ എഞ്ചിനും ഇന്റീരിയറുമടക്കം വെള്ളം കയറാൻ സാദ്ധ്യതയുണ്ട്. സഡൻ ബ്രേക്കിംഗ് ചെയ്യുമ്പോൾ വാഹനത്തിന് പിന്നിൽ വരുന്ന വാഹനങ്ങൾ ഇടിക്കാമുള്ള സാദ്ധ്യത കൂടുതലാണ്. അതുപോലെ തന്നെ റെവ്‌സ് കുറയുന്നത് കാരണം എക്‌സ്‌ഹോസ്റ്റ് പൈപ്പിലൂടെ എഞ്ചിനുള്ളിൽ വെള്ളം കയറാനുള്ള സാദ്ധ്യതയും വർദ്ധിപ്പിക്കുന്നു.

ഇത്തരത്തിൽ ജാഗ്രതയോടെ വാഹനമോടിച്ചാൽ വാഹനം വർക്ക്‌ഷോപ്പിൽ കയറ്റാതെ കൊണ്ടുനടക്കാവുന്നതാണ്. മഴയാണെന്ന് കരുതി ഒഴിവാക്കാൻ പറ്റാത്ത അത്യാവശ്യ യാത്രകൾ ഉണ്ടാകും. അത്തരം സാഹചര്യങ്ങളിൽ ആവശ്യമായ മുൻകരുതലുകൾ എടുത്ത് ശ്രദ്ധയോടെ വാഹനം ഓടിക്കാൻ ശ്രദ്ധിക്കുക. എഞ്ചിൻ അടക്കമുള്ള ഭാഗങ്ങളിൽ വെള്ളം കയറിയാൽ കുറച്ചധികം പണം വർക്ഷോപ്പിൽ കൊടുക്കേണ്ടി വരും. അതുപോലെ തന്നെ ബാറ്ററിയടക്കമുള്ള മറ്റ് വിലപിടിപ്പുള്ള ഘടകങ്ങളുടെ പരിപാലനത്തിലും മഴക്കാലത്ത് പ്രത്യേക ശ്രദ്ധ വേണം. മഴക്കാലത്ത് ബാറ്ററി തുരുമ്പ് പിടിക്കാനും മറ്റും സാദ്ധ്യത ഏറെയാണ്.