കൊച്ചി: മാദ്ധ്യമപ്രവർത്തക അഖില നന്ദകുമാറിന് ഐക്യദാർഢ്യം പ്രഖ്യാപിച്ചും സർക്കാരിനെ വിമർശി
ച്ചും നടനും സംവിധായകനുമായ ജോയ് മാത്യുവിന്റെ ഫേസ്ബുക്ക് കുറിപ്പ്. ‘എത്ര കെട്ടിപ്പൂട്ടിയാലും ശരിയായ മാദ്ധ്യമ പ്രവർത്തകരെ വിഡ്ഢിയായ ഒരു ഫാസിസ്റ്റ് ഭരണാധികാരിക്കും തളയ്ക്കാനാവില്ല ഏഷ്യാനെറ്റ് റിപ്പോർട്ടർ അഖില നന്ദകുമാറിന് ഐക്യദാർഢ്യം’, എന്നാണ് ജോയ് മാത്യു കുറിച്ചത്.
ജോയ് മാത്യുവിന്റെ പ്രതികരണത്തിന് പിന്തുണയുമായി മേജർ രവിയും എത്തി. നിങ്ങളുടെ കൂടെ എന്നാണ് ജോയ് മാത്യുവിന്റെ പോസ്റ്റിന് താഴെ മേജർ രവി കമന്റ് ചെയ്തത്. അഖില നന്ദകുമാറിനെതിരെ കേസെടുത്ത പോലീസ് നടപടിയിൽ ഏഷ്യാനെറ്റ് ന്യൂസിന് പിന്തുണയുമായി മാദ്ധ്യമ ലോകം രംഗത്തെത്തിയിട്ടുണ്ട്. മലയാള മനോരമ, മാതൃഭൂമി, മാധ്യമം, കേരള കൗമുദി,ജന്മഭൂമി ഉൾപ്പെടെയുള്ള മലയാള മാദ്ധ്യമങ്ങൾ പോലീസ് കേസെടുത്ത സർക്കാർ നിലപാടിനെ വിമർശിച്ച് രംഗത്തെത്തി.ദേശീയ തലത്തിലും കേരള സർക്കാരിന്റെ നിലപാടുകൾ വലിയ രീതിയിൽ വിമർശിക്കപ്പെടുന്നുണ്ട്. സിതാറാം യച്ചൂരി അടക്കമുള്ളവർ വിഷയത്തിൽ മറുപടി പറയാതെ പിന്തിരിഞ്ഞോടിയതും ഇതിനുദാഹരണമാണ്.
ഇതിനിടെ സർക്കാർ വിരുദ്ധ എസ്എഫ്ഐ വിരുദ്ധ പ്രചാരണം ഉണ്ടായാൽ ഇനിയും കേസെടുക്കുമെന്ന തന്റെ നിലപാടിൽ നിന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ തടിതപ്പിയിരുന്നു. താൻ അങ്ങനെ പറഞ്ഞിട്ടില്ലെന്നും താൻ പറഞ്ഞതിനെ തെറ്റായി വ്യാഖാനിക്കുകയായിരുന്നുവെന്നും അദ്ദേഹം മലക്കംമറിഞ്ഞു. എന്നാൽ ഏഷ്യാനെറ്റ് ന്യൂസ് ചീഫ് റിപ്പോർട്ടർ അഖില നന്ദകുമാറും ഗൂഢാലോചനയിൽ പങ്കാളിയാണെന്നും അതിനാലാണ് കേസെടുത്തതെന്നും അദ്ദേഹം ഇന്നും വാദിച്ചു.
