പലരും നേരിടുന്ന ഒരു പ്രധാന പ്രശ്നമാണ് കുടവയർ. ശരീരഭാരം കൂടുന്നതും കുടവയർ രൂപപ്പെടുന്നതും നിരവധി ആരോഗ്യപ്രശ്നങ്ങളിലേക്ക് നയിക്കും. അതുകൊണ്ട് തന്നെ കുടവയറിനെയും അമിത വണ്ണത്തേയും പ്രതിരോധിക്കാൻ ഭക്ഷണ കാര്യത്തിൽ അതീവ ശ്രദ്ധ പുലർത്തണം. ഭക്ഷണക്രമത്തിൽ ഒരു നിയന്ത്രണം വെച്ചാൽ തന്നെ ഒരു പരിധിവരെ വേഗത്തിൽ വയർ കുറയ്ക്കാൻ പറ്റും. ഇതിനായി ഒരു ഡയറ്റ് പ്ലാൻ ഉണ്ടാക്കുമ്പോൾ ഉൾപ്പെടുത്താവുന്ന ഭക്ഷണങ്ങളെ കുറിച്ച് നോക്കാം.
അതിരാവിലെ വെറും വയറ്റിൽ രണ്ട് ഗ്ലാസ് ചെറുചൂടുവെള്ളം കുടിക്കുക. ഇത് കൊഴുപ്പ് അലിയിച്ചു കളയാൻ സഹായിക്കും. കൂടാതെ പ്രഭാത ഭക്ഷണത്തിൽ പ്രോട്ടീൻ അടങ്ങിയ ഭക്ഷണ സാധനങ്ങൾ മാത്രം കഴിക്കുക. പ്രഭാത ഭക്ഷണത്തിൽ പച്ചക്കറികൾ ഉൾപ്പെടുത്തുന്നതും നല്ലതാണ്. ഇവ സാലഡുകളായി ഉൾപ്പെടുത്തുന്നതും നല്ലതാണ്. കൂടാതെ പ്രഭാത ഭക്ഷണത്തിൽ എണ്ണകൾ കൊണ്ടുള്ള ഭക്ഷണം ഒഴുവാക്കുക. രാവിലെ ഇറച്ചി വിഭവങ്ങൾ ഒഴിവാക്കുക. പകരം മുട്ട കഴിക്കാവുന്നതാണ്. മുട്ടയുടെ വെള്ള തടി കുറയാൻ സഹായിക്കും.
ഉച്ചഭക്ഷണത്തിൽ വളരെ ചെറിയ അളവിൽ ചോറ് കഴിക്കുക. ഒന്നിൽ കൂടുതൽ തവണ കഴിവതും ചോറ് കഴിക്കാതിരിക്കുക. ചോറിനൊപ്പം അധികമായി പച്ചക്കറികൾ അടങ്ങിയ കറികൾ ഉൾപ്പെടുത്തുന്നതും നല്ലതായിരിക്കും. ഇതിന് ശേഷമുള്ള ഇടനേരങ്ങളിൽ പരമാവധി വിശന്നിരിക്കാതിരിക്കാൻ ശ്രമിക്കുക. ഈ സമയത്ത് ധാന്യങ്ങൾ പുഴുങ്ങിയത്, ബദാം, അണ്ടിപ്പരിപ്പ്, പോലുള്ള ചെറു ഭക്ഷണങ്ങൾ കഴിക്കുക.
ചായ, കാപ്പി, കാർബോണേറ്റഡ് ഡ്രിങ്ക്സ് എന്നിവ കുടിയ്ക്കുന്നത് കുറയ്ക്കുക. പഞ്ചസാര അധികമായി ചേർത്തിട്ടുള്ള ഭക്ഷണം ശരീരഭാരം വർദ്ധിപ്പിക്കും. ധാരാളം നാരുകൾ അടങ്ങിയ ഭക്ഷണം കഴിക്കുന്നത് വയർ കുറയാൻ സഹായിക്കും. ഫൈബർ അടങ്ങിയ പച്ചക്കറികൾ, പഴങ്ങൾ, പയർ വർഗങ്ങൾ എന്നിവ ശീലമാക്കുക. കൂടാതെ രാത്രിയിൽ കട്ടിയുള്ള ഭക്ഷണം കഴിക്കരുത്. മിതമായ അളവിൽ ഫ്രൂട്ട്സ് കഴിക്കുന്നതാണ് രാത്രി നല്ലത്. അത്താഴമായി ചോറ് കഴിക്കുന്നത് പൂർണമായി ഒഴിവാക്കണം. ഇതിനെല്ലാം കൂടെ ദിവസവും ഒരു മണിക്കൂർ വ്യായാമത്തിൽ ഏർപ്പെടുന്നതും വയർ കുറയാൻ നല്ലതാണ്.
