തൊഴിലാളികൾക്ക് ഏറ്റവും ഇഷ്ടപ്പെട്ട കമ്പനിയെന്ന ഖ്യാതി ടാറ്റ പവറിന് സ്വന്തം. ഇന്ത്യയിലെ ഏറ്റവും ആകർഷകമായ തൊഴിൽദാതാക്കളുടെ ബ്രാൻഡ് എന്ന ബഹുമതിയാണ് ടാറ്റ പവറിന് ലഭിച്ചത്. റാൻഡ്സ്റ്റഡ് ഇന്ത്യ നടത്തിയ റിസർച്ച് റിപ്പോർട്ടിലാണ് തൊഴിലാളികൾക്കിടയിൽ ടാറ്റ പവറിനുള്ള ജനപ്രീതി വ്യക്തമാക്കുന്നത്. റിപ്പോർട്ട് പ്രകാരം രണ്ടാം സ്ഥാനം ആമസോണും മൂന്നാം സ്ഥാനം ടാറ്റ സ്റ്റീലും സ്വന്തമാക്കിയിട്ടുണ്ട്.
ആരോഗ്യം, പ്രശസ്തി, തൊഴിൽ പുരോഗതി സാദ്ധ്യതകൾ എന്നിവയിൽ ടാറ്റാ പവർ മികച്ച സ്കോർ രേഖപ്പെടുത്തി. 32 വിപണികളെയും ആഗോള സമ്പദ് വ്യവസ്ഥയുടെ 75 ശതമാനത്തെയും ഉൾപ്പെടുത്തി ലോകമെമ്പാടുമുള്ള 1.63 ലക്ഷം പേർക്കിടയിൽ നടത്തിയ സർവേയുടെ അടിസ്ഥാനത്തിലാണ് റിപ്പോർട്ട്. ജോലിയും ജീവിതവും ഓരേ രീതിയിൽ കൊണ്ടുപോകാൻ സ്ത്രീകൾ പരിശ്രമിക്കാറുണ്ടെന്നും സന്തുലിതാവസ്ഥയ്ക്കാണ് വനിത ജീവനക്കാർ കൂടുതൽ ഊന്നൽ നൽകുന്നതെന്നും റിപ്പോർട്ടിൽ പറയുന്നു. അധികം ജോലി ചെയ്യുന്നതിന് അധിക ശമ്പളം തരുന്നതിലും തൊഴിലുടമ തയ്യാറാണെന്നും റിപ്പോർട്ടിലുണ്ട്.
ഏറ്റവും ആകർഷകമായ തൊഴിൽദാതാക്കളുടെ ആദ്യ 10 ബ്രാൻഡുകളിൽ ടിസിഎസ് നാലാം സ്ഥാനവും, മൈക്രോസോഫ്റ്റ്, സാംസംഗ് ഇന്ത്യ, ഇൻഫോസിസ് , ടാറ്റ മോട്ടോഴ്സ് , ഐബിഎം, റിലയൻസ് ഇൻഡസ്ട്രീസ് എന്നിവയും ഉൾപ്പെടുന്നു. ഓട്ടോമേറ്റീവ് മേഖലയാണ് അധികം പേരും തിരഞ്ഞെടുത്തത്. ഐടി, ടെലികോം മേഖലകളാണ് പിന്നീട് തൊഴിലാളികൾ അധികവും ആകൃഷ്ടരാകുന്നത്.
