കടൽഭക്ഷണ പ്രേമികൾക്ക് ഒഴിവാക്കാൻ കഴിയാത്ത ഒന്നാണ് ചെമ്മീൻ. മത്സ്യ വിഭവങ്ങൾ ഇഷ്ടപ്പെടാത്ത പലരും ചെമ്മീൻ മാത്രം കഴിക്കുന്നതും നമ്മൾ കണ്ടിട്ടുണ്ട്. അത്രമാത്രം ചെമ്മീൻ പ്രേമികളാണ് നാട്ടിലുള്ളത്. ചെമ്മീൻ റോസ്റ്റ് ചെയ്തും കറിവെച്ചും വരട്ടിയും ഉണക്കി പൊടിച്ചും ചമ്മന്തിയിൽ ചേർത്തുമെല്ലാം പലവിധത്തിൽ ആഹാരമാക്കാറുണ്ട്. ഇത്രമാത്രം സ്വാദിഷ്ടമായ ചെമ്മീൻ പാകം ചെയ്യുന്നതിന് മുമ്പ് വൃത്തിയാക്കിയെടുക്കുക എന്നുള്ളതാണ് ടാസ്ക്.
വിവിധ വലിപ്പത്തിലുള്ള ചെമ്മീൻ നമുക്ക് ലഭ്യമാണ്. കൈപ്പത്തിയുടെ വലിപ്പമുള്ള കൊഞ്ച് മുതൽ പൊടിചെമ്മീൻ വരെ മാർക്കറ്റിൽ നിന്ന് ലഭിക്കും. ഇതിൽ ക്ലീൻ ചെയ്തെടുക്കാൻ ഏറ്റവും പ്രയാസം ചെറിയ ചെമ്മീനാണ്. താരതമ്യേന വലിപ്പം കുറവുള്ള ചെമ്മീനാകുമ്പോൾ അത് നന്നാക്കിയെടുക്കാനുള്ള പ്രയാസം മൂലം പലരും അതിന്റെ കറുത്ത നാര് കളഞ്ഞ് കറിവയ്ക്കാൻ മെനക്കെടാറില്ല. ചെറിയ ചെമ്മീന്റെ നാര് കഴിച്ചാലും വലിയ ആരോഗ്യപ്രശ്നമൊന്നുമില്ലെന്ന വിലയിരുത്തലാണ് പലർക്കും.
ഇത്തരത്തിൽ മടി കാരണം ചെമ്മീൻ ശരിയായ വിധം വൃത്തിയാക്കാതെ കഴിച്ചാൽ ആരോഗ്യ പ്രശ്നങ്ങളുണ്ടാകുമോ? അറിയാം..
ചെമ്മീനിന്റെ മുതുകിൽ കാണുന്ന കറുത്ത നാര് അതിന്റെ നാഡിയാണ് (vein). ഇവയോടൊപ്പം പച്ചകലർന്ന നാരും ചിലപ്പോൾ കാണാൻ സാധിക്കും. അത് ചെമ്മീനിന്റെ ശരീരത്തിലുള്ള മാലിന്യങ്ങളും വിഷവസ്തുക്കളുമാണ്. ഇത്തരം വസ്തുക്കൾ നീക്കം ചെയ്യാതിരിക്കുകയോ ഭാഗികമായി നീക്കം ചെയ്ത് ആഹാരമാക്കുകയോ ചെയ്യുന്നത് വലിയ അലർജിക്ക് കാരണമാകാമെന്നാണ് ആരോഗ്യ വിദഗ്ധർ പറയുന്നത്. അലർജിയുള്ള ആളുകൾ ചെമ്മീനിന്റെ കറുത്ത നാര് കഴിക്കുമ്പോൾ തൊണ്ടവേദന, ശ്വാസതടസം എന്നിവയും മരണം വരെ സംഭവിക്കാനുള്ള സാധ്യതയുമുണ്ട്. അതേസമയം പൊതുവെ അലർജിയില്ലാത്ത ആളുകൾക്ക് ഈ പ്രശ്നം പ്രഥമദൃഷ്ട്യാ ഉണ്ടാവുകയില്ല. പക്ഷെ ഈ വിഷവസ്തുക്കൾ ശരീരത്തിൽ ചെന്നാൽ അത് ദഹന വ്യവസ്ഥയെയും കുടലിന്റെ ആരോഗ്യത്തെയും ബാധിച്ചേക്കാം. ചിലരിൽ നേരിയ വയറുവേദന അനുഭവപ്പെടാവുന്നതാണ്. മറ്റ് ചിലരിൽ വേദനകൾ ഒന്നും തന്നെ പ്രകടമാകുകയില്ല. പക്ഷെ ശരിയായ വിധം ക്ലീൻ ചെയ്തെടുക്കാത്ത ചെമ്മീൻ നിരന്തരമായി കഴിക്കുന്നത് മൂലം വലിയ ആരോഗ്യപ്രശ്നങ്ങൾ പതിയെ ആരംഭിക്കുമെന്നാണ് വിദഗ്ധരുടെ മുന്നറിയിപ്പ്.
അതുകൊണ്ട് ചെമ്മീൻ ആഹാരമാക്കുന്ന ഏതൊരാളും അവയുടെ കറുത്ത നാരും പച്ചകലർന്ന വിസർജ്ജ്യവും കളഞ്ഞതിന് ശേഷം പാകം ചെയ്ത് കഴിക്കാൻ ശ്രദ്ധിക്കേണ്ടതാണ്.
