തെന്നിന്ത്യൻ നടനും ഡബ്ബിംഗ് ആർട്ടിസ്റ്റും സംവിധായകനുമായ ബോസ് വെങ്കടിന്റെ സഹോദരങ്ങൾ ഇരുവരും ഒരേദിവസം അന്തരിച്ചു. ഹൃദയാഘാതം മൂലം സഹോദരി മരിച്ചതിന് തൊട്ടുപിന്നാലെ വെങ്കടിന്റെ സഹോദരനും ഹൃദയാഘാതം സംഭവിച്ച് അന്തരിക്കുകയായിരുന്നു.
ചെന്നൈയിൽ വച്ചായിരുന്നു സഹോദരി അന്തരിച്ചത്. വേർപാടിന്റെ വേദനയിൽ നിന്നും മുക്തമാകുന്നതിന് മുമ്പ് തന്നെ അപ്രതീക്ഷിതമായി സഹോദരൻ രംഗനാഥന് ഹൃദയാഘാതം സംഭവിക്കുകയും തൊട്ടുപിന്നാലെ മരണത്തിന് കീഴടങ്ങുകയും ചെയ്തു.
സഹോദരിയുടെ മരണാന്തര ചടങ്ങ് പുരോഗമിക്കവേ അവരുടെ മൃതദേഹത്തിന് സമീപം നിന്നിരുന്ന രംഗനാഥൻ കുഴഞ്ഞുവീഴുകയായിരുന്നു. തുടർന്ന് മരണം സ്ഥിരീകരിച്ചതോടെ ഇരുവരുടെയും മരണാന്തര ചടങ്ങ് ഒരേസമയം ഒരേസ്ഥലത്ത് വച്ച് നടത്തുകയും ചെയ്തു.
വില്ലനായും സ്വഭാവ നടനായും സിനിമാ പ്രേമികളുടെ മുമ്പിലെത്തിയ നടനാണ് ബോസ് വെങ്കട്. 2020ലാണ് അദ്ദേഹം സംവിധാനത്തിലേക്ക് ചുവടുവയ്ക്കുന്നത്. ഒരുകാലത്ത് നിരവധി ടെലിവിഷൻ പരമ്പരകളിലും സജീവമായിരുന്നു അദ്ദേഹം.
