നഗരത്തിന്റെ പലയിടങ്ങളിലായി ഇന്ന് രാവിലെ മുതൽ ഒരു ലൂക്ക് ഔട്ട് നോട്ടീസ് കണ്ട് ഞെട്ടിയിരിക്കുകയാണ് മലയാളികൾ. അശോകൻ എന്ന കൊടും കുറ്റവാളിയെ കുറിച്ചാണ് ലുക്ക് ഒൗട്ട് നോട്ടീസ്. ഇയാൾ വിവിധ സ്ഥലങ്ങളിലായി നിരവധി ക്രിമിനൽ കേസുകളിൽ പ്രതിയാണ്. പ്രായം നാൽപ്പത്തിയേഴ്. മലയാളവും തമിഴും സംസാരിക്കും. നിലവിൽ ഒളിവിൽ താമസിക്കുന്ന അശോകനെ കുറിച്ച് എന്തെങ്കിലും വിവരം ലഭിക്കുന്നവർ അടുത്തുള്ള പോലീസ് സ്റ്റേഷനിൽ വിവരം അറിയിക്കുക എന്നായിരുന്നു ലുക്ക് ഔട്ട് നോട്ടീസിലെ വിവരം.
ആദ്യം കാണുമ്പോൾ അശോകനെ പരിചയം തോന്നും. വീണ്ടും ഒന്നു നോക്കിയാൽ ആരാധകർ ഒന്ന് ഞെട്ടും. ഇത് കുഞ്ചാക്കോ ബോബൻ അല്ലെ എന്ന് അറിയാതെ പറഞ്ഞുപോകും. മലയാളത്തിന്റെ ചോക്ലേറ്റ് ഹീറോ ചാക്കോച്ചന്റെ ഏറ്റവും പുതിയ ചിത്രത്തിലെ വേഷമാണ് പിടികിട്ടാപ്പുള്ളിയായ അശോകൻ. ഒരു കാലത്ത് കോളേജ് ഹീറോ ആയിരുന്ന താരം ഇപ്പോൾ ആ ട്രെൻഡ് ഒന്ന് മാറ്റിപ്പിടിച്ചിരിക്കുകയാണ്.
അദ്ദേഹത്തിന്റെ സമീപകാല ഹിറ്റുകളായ ന്നാ താൻ കേസുകൊട്, നായാട്ട്, അള്ളു രാമേന്ദ്രൻ തുടങ്ങിയവ ചില ഉദാഹരണങ്ങൾ. അതുപോലെ മറ്റൊരു ചിത്രത്തിന്റെ പ്രൊമോഷന്റെ ഭാഗമായാണോ ഈ ലുക്ക്ഔട്ട് നോട്ടീസ് എന്നാണ് ഇപ്പോൾ ആരാധകർ സംശയിക്കുന്നത്. സംഭവം സോഷ്യൽ മീഡിയയിൽ പ്രചരിച്ചതോടെ രസകരമായ കമന്റുകളാണ് നിറയുന്നത്. ഇങ്ങനെയാണോ ഒരു കുറ്റവാളിയുടെ ചിത്രം വരക്കേണ്ടത്?. എന്നാണ് സംഭവം മനസ്സിലാകാത്തവർ പ്രതികരിച്ചിരിക്കുന്നത്.
