ലണ്ടൻ: മാങ്ങയ്ക്ക് വേണ്ടി തെരുവിൽ അടിപിടി. ലണ്ടനിലെ ഒരു തെരുവിലാണ് സംഭവം നടന്നത്. മാങ്ങയ്ക്ക് വേണ്ടി ആളുകൾ അടികൂടുന്നതിന്റെ വീഡിയോ സമൂഹമാദ്ധ്യമങ്ങളിൽ വൈറലാണ്. ലണ്ടനിലെ തിരക്കുള്ള ഒരു മാർക്കറ്റിൽ നിന്നുള്ള വീഡിയോ ഒരു ട്വിറ്റർ ഉപയോക്താവാണ് പങ്കുവെച്ചിരിക്കുന്നത്.
ദൃശ്യങ്ങളിൽ സ്ത്രീകളെയും കുട്ടികളെയും കാണാം. പെട്ടെന്ന് ആളുകൾക്കിടയിൽ ഒരു വഴക്കുണ്ടാകുകയും ചെയ്യുന്നുണ്ട്. തുടർന്ന് രണ്ട് ഗ്രൂപ്പുകളായി തിരിഞ്ഞ് അടിപിടിയിലേക്ക് തിരിയുകയായിരുന്നു. പ്രശ്നം വഷളായതോടെ ഒരു സ്ത്രീ തന്റെ ഭാഗത്ത് നിന്നുള്ള ഒരാളെ സമാധാനിപ്പിച്ച് പിന്തിരിപ്പിക്കാൻ നോക്കുന്നുണ്ടെങ്കിലും പിന്നീട് ഇതേ സ്ത്രീ തന്നെ വഴക്കിലേർപ്പെടുന്നത് കാണാം. മറുവശത്തുള്ള ആളെ തള്ളിയിടാൻ ശ്രമിക്കുന്നുണ്ട്.
ഇതിനിടയിൽ അടുത്തുള്ള ആളെ ചവിട്ടാൻ കാലുപൊക്കുന്ന ഒരു യുവാവ് നിലത്തുള്ള വെള്ളത്തിൽ കാലുവഴുതി വീഴുന്നുമുണ്ട്. ഗ്രൂപ്പുകൾ തമ്മിലുള്ള ഉന്തുംതള്ളും കാണാനായി നിരവധിപേരാണ് അവിടെ നോക്കിനിൽക്കുന്നത്. മാങ്ങയുടെ പേരിലാണ് അടി നടന്നതെന്ന് പറയപ്പെടുന്നുണ്ടെങ്കിലും യഥാർത്ഥ കാരണം വ്യക്തമല്ല.
