പുതിയ പാട്ടുകളും സിനിമയും റിലീസ് ആകുന്നതിന്റെ സന്തോഷത്തിലാണ് വിജയ് യേശുദാസ്. ഇപ്പോഴിതാ താരത്തിന്റെ രൂപമാറ്റമാണ് ശ്രദ്ധേയമായിരിക്കുന്നത്. ദാസേട്ടന്റെ ലുക്കിലേയ്ക്ക്് മാറിയല്ലോ ചേട്ടൻ എന്ന് വിജയ് യേശുദാസിനോട് നടിയും അവതാരകയുമായ പാർവതി ചോദിക്കുന്നതിന്റെയും താരം മറുപടി പറയുന്നതിന്റെയും ദൃശ്യങ്ങളാണ് സമൂഹമാദ്ധ്യമത്തിൽ വൈറലായിരിക്കുന്നത്. പാർവതിയുടെ ചോദ്യത്തിന് ഒരു ഷൂട്ടിന്റെ ഭാഗമായാണ് തന്റെ രൂപമാറ്റമെന്നായിരുന്നു വിജയ്യുടെ പ്രതികരണം. നിങ്ങൾ ഓരോരുത്തരും ഇത് പറഞ്ഞു കേൾക്കുമ്പോൾ ഒരുപാട് സന്തോഷം ഉണ്ടെന്നും താരം പറഞ്ഞു. യേശുദാസിന്റെ അത്രയും ലുക്കിലേക്ക് എത്താൻ സാധിക്കില്ല, അമ്മയുടെ മുഖച്ഛായ ആണ് തനിക്കെന്നും അപ്പയ്ക്ക് ഇപ്പോൾ പണ്ടത്തേക്കാളും താടിയും മുടിയും കൂടുതലാണെന്നും വിജയ് പറഞ്ഞു.
താരത്തിന്റെ വാക്കുകൾ….
‘പണ്ടത്തേക്കാൾ കൂടുതൽ ആണ് അപ്പയുടെ താടിയും മുടിയും. അമേരിക്കയിൽ ആയതുകൊണ്ട് അത് ഷെയ്പ്പ് ചെയ്യാനൊന്നും കഴിയാറില്ല. നാട്ടിൽ ആയിരുന്നപ്പോൾ അതിനായി ഒരാൾ വരുമായിരുന്നു.ഇപ്പോൾ ഞാൻ അമേരിക്കയിൽ പോകുമ്പോഴാണ് അപ്പയ്ക്ക് ട്രിം ചെയ്ത് കൊടുക്കുന്നത്. എന്റെ മുൻപിൽ മാത്രമാണ് കുറച്ചു ധൈര്യത്തോടെ അപ്പ ഇരിയ്ക്കുന്നത്. വളരെ ബുദ്ധിമുട്ടുള്ള കാര്യമാണ് അദ്ദേഹത്തെ ഒന്ന് ഇരുത്തുക എന്നത്. അമ്മ ആണ് പുഷ് ചെയ്യുക.
ദാസേട്ടന്റെ മകൻ എന്ന് കേൾക്കുമ്പോൾ എന്തിനാണ് ഇങ്ങനെ പറയുന്നതെന്ന് അറിയില്ല, എന്ത് കഷ്ടമാണ് എന്ന് തോന്നിയിട്ടുമുണ്ട്. എനിക്ക് ബ്രേക്ക് വന്നത് നിവേദ്യത്തിലൂടെ ആയിരുന്നു. പാട്ടിലെ കറക്ഷൻസ് ഒക്കെ അപ്പ പറഞ്ഞു തരാറുണ്ട്. ഈ പാട്ട് ഈ രാഗത്തിലാണ് എന്ന് പറയാറുണ്ട്. എന്തെങ്കിലും ടിപ്പ്സ് ഒക്കെ പറഞ്ഞുതരാറുണ്ട്. ദാസേട്ടൻ എന്ന അച്ഛൻ ദേഷ്യക്കാരൻ ആണോ എന്ന ചോദ്യത്തിന്, എല്ലാവർക്കും ദേഷ്യമുണ്ടല്ലോ എന്നായിരുന്നു വിജയ് യേശുദാസിന്റെ മറുപടി.
അപ്പയുടെ കൂടെ ഫാമിലി ആയി എപ്പോഴും നമ്മൾ ഉണ്ടാകുമായിരുന്നു. ട്രിപ്പിനുവേണ്ടിയുള്ള യാത്രകൾ ഒന്നും ഉണ്ടാകുമായിരുന്നില്ല, പ്രോഗ്രാമിനായി അപ്പയും അമ്മയും പോകുമ്പോൾ നമ്മളെയും ചെറുപ്പകാലങ്ങളിൽ കൊണ്ട് പോകുമായിരുന്നു. എന്റെ മോൻ ജനിക്കുന്ന സമയത്താണ് ആത്മീയ യാത്ര വേണമെന്ന അമ്മയുടെ ആഗ്രഹത്തിന് സ്പെയിനിലേക്ക് ഒരു യാത്ര നടത്തുന്നത്. ഇപ്പോൾ അമേരിക്കയിൽ ആയപ്പോൾ അപ്പയും അമ്മയും കറങ്ങാൻ പോകും’. – വിജയ് പറഞ്ഞു.
