ഒരു കാലത്ത് വീടുകളിലെ പ്രധാന താരമായിരുന്നു മൺ ചട്ടിയും ഇരുമ്പ് പാത്രവും അലുമിനിയവുമൊക്ക. എന്നാൽ ഇതൊക്കെ പല അടുക്കളയിൽ നിന്നു പടിയിറങ്ങി കഴിഞ്ഞു. ഇന്നത്തെ അടുക്കളകൾ വാഴുന്നത് നോൺസ്റ്റിക് പാത്രങ്ങളാണ്. ഉപയോഗിക്കാനുള്ള സൗകര്യമാണ് ഇതിന് പിന്നിലെ പ്രധാന കാരണം. നോൺസ്റ്റിക് പാത്രങ്ങൾ ഉപയോഗിക്കുന്നത് വഴി പാചകവസ്തുക്കൾ പാത്രത്തിൽ പറ്റിപ്പിടിച്ചിരിക്കുന്ന പ്രശ്നം പരിഹരിക്കാനും ഇത് സഹായിക്കുന്നു. ചില സന്ദർഭങ്ങളിൽ തേച്ച് കഴുകേണ്ട കാര്യം പോലും നോൺസ്റ്റിക് പാത്രങ്ങൾ ഉപയോഗിക്കുമ്പോൾ വരുന്നില്ലെന്നതും വീട്ടമ്മമാരെ ആകർഷിക്കുന്നു.
ഇത്തരത്തിൽ എണ്ണിയാലൊടുങ്ങാത്ത അത്രമാത്രം ഗുണങ്ങളാണ് നോൺസ്റ്റിക് പാത്രങ്ങൾക്കുള്ളത്. എന്നാൽ ഇത്തരത്തിൽ കണ്ണുമടച്ച് ഈ പാത്രങ്ങൾ ഇങ്ങനെ ഉപയോഗിക്കുന്നത് വഴി ആരോഗ്യത്തിന് എന്തെങ്കിലും പ്രശ്നങ്ങളുണ്ടാകുമോ എന്ന് പോലും ചിന്തിക്കാതെയാണ് പലരും ഉപയോഗിക്കുന്നത്. ചില പഠനങ്ങൾ പ്രകാരം നോൺസ്റ്റിക് പാത്രങ്ങളുടെ ഉപയോഗം ക്യാൻസറിന് പോലും കാരണമാകും.
പേര് പോലെ തന്നെ സ്റ്റിക്കി ആകാതിരിക്കാനാണ് നോൺസ്റ്റിക് പാത്രങ്ങൾ. പാത്രത്തിന്റെ അടിഭാഗത്ത് ഭക്ഷണത്തിന്റെ കണികൾ പറ്റിനിൽക്കാതിരിക്കാനായി ഈ പാത്രങ്ങളുടെ ഉപരിതലത്തിലായി ഘടിപ്പിച്ചിരിക്കുന്ന വസ്തുവാണ് ടെഫ്ളോൺ. ഈ വസ്തുവാണ് ഭക്ഷണം ഒട്ടിപ്പിടിക്കാതിരിക്കുന്നതിനുള്ള കാരണം. ടെഫ്ളോണുകൾ അടക്കി ചേർക്കാനായി പെർഫ്ളൂറോക്റ്റാനോയിക് ആസിഡ് എന്ന രാസവസ്തുവാണ് ഉപയോഗിക്കുന്നത്. വില കുറഞ്ഞ നോൺസ്റ്റിക് പാത്രങ്ങളിലാണ് അധികവും ഉപയോഗിക്കുന്നത്. ഈ രാസസംയുക്തങ്ങൾ നിരവധി ആരോഗ്യപ്രശ്നങ്ങളാണ് സൃഷ്ടിക്കുന്നത്. സ്താനാർബുദം, വന്ധ്യത, കരളിന്റെ ഭാഗത്ത് മുഴ, വൃക്ക രോഗങ്ങൾ, തൈറോയിഡ് എന്നിവ വരാനുള്ള സാദ്ധ്യത അധികമാണ്.
ടെഫ്ളോൺ ഉയർന്ന താപനിലയിൽ ചൂടാകുമ്പോഴാണ് ആരോഗ്യത്തെ ബാധിക്കുന്നത്. ഇത് വായുവിലേക്ക് വിഷാംശമുള്ള രാസവസ്തുക്കളെ പുറപ്പെടുവിക്കും. ഈ പുക ശ്വസിക്കുന്നത് വഴി ഇൻഫ്ളുവൻസ പോലുള്ള രോഗങ്ങളിലേക്ക് നയിച്ചേക്കാം. ജലദോഷം, പനി, തലവേദന തുടങ്ങിയവയും ഉണ്ടാകാനുള്ള സാദ്ധ്യത അധികമാണ്.
