മലയാളികളുടെ എക്കാലത്തെയും പ്രിയ താരമാണ് ജയറാം. വീട്ടിലെ രസകരമായ കാഴ്ചകൾ ഉൾപ്പെടുന്ന വീഡിയോകളെല്ലാം താരം സമൂഹമാദ്ധ്യമങ്ങളിലൂടെ പങ്കുവെയ്‌ക്കാറുണ്ട്. അത്തരത്തിലൊരു വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുന്നത്. പിടയ്‌ക്കുന്ന മീനുമായി നിൽക്കുന്ന ജയറാമിനെയാണ് വീഡിയോയിൽ കാണുന്നത്.നാടൻ രൂപത്തിൽ ലുങ്കിയും ടീഷർട്ടും ധരിച്ച് മീനിനെയും പിടിച്ച് നിൽക്കുന്ന താരമാണ് വീഡിയോയിലുള്ളത്.
വീഡിയോ വീട്ടിൽ നിന്നുള്ളതാണോ ഷൂട്ടിംഗ് ലൊക്കേഷനിൽ നിന്നുമാണോ എന്നതിൽ വ്യക്തതയില്ല. മനസിനക്കരെ സിനിമയിലെ ‘ചെണ്ടയ്‌ക്കൊരു കോലുണ്ടെടാ’ എന്ന ഗാനം പശ്ചാത്തലഗാനമായി വീഡിയോയിൽ കേൾക്കാം. കറി വെച്ചിട്ട് അറിയിക്കാം എന്നായിരുന്നു വീഡിയോയുടെ അവസാനം താരം പറയുന്നത്. ഇതിന് പിന്നാലെ വീഡിയോ വൈറലായതോടെ മീൻ എങ്ങനെ പാകം ചെയ്യണമെന്നുള്ള കാര്യങ്ങൾ ആരാധകരും കമന്റ് ബോക്‌സിൽ പറഞ്ഞു.
കുറച്ചു നാളുകൾക്ക് മുൻപ് തന്റെ കൃഷിയിടത്തിലെ ദൃശ്യങ്ങൾ ജയറാം പങ്കുവെച്ചിരുന്നു. തന്റെ തോട്ടത്തിൽ വിളഞ്ഞ തക്കാളിയും മത്തങ്ങയും വെള്ളരിക്കയുമെല്ലാം ശേഖരിച്ച് നടക്കുന്ന വീഡിയോ ആയിരുന്നു പങ്കുവെച്ചത്. അന്ന് വീഡിയോയ്‌ക്കും ഇതേ ഗാനമായിരുന്നു പശ്ചാത്തലമായി ഉൾപ്പെടുത്തിയിരുന്നത്.
