തിരുവനന്തപുരം: കേരളത്തിൽ വീണ്ടും പനി മരണം. തിരുവനന്തപുരം വിതുര മേമല സ്വദേശി സുശീല(48)യാണ് പനി ബാധിച്ച് മരിച്ചത്. ചികിത്സയിൽ കഴിയവെ സുശീലയുടെ ആരോഗ്യസ്ഥിതി വഷളായതിനെ തുടർന്നാണ് മരണം. രണ്ട് ദിവസമായി തിരുവനന്തപുരം മെഡിക്കൽ കോളേജിൽ ചികിത്സയിലായിരുന്നു സുശീല. പനിയെ തുടർന്ന് കൗണ്ട് കുറഞ്ഞതിനെ തുടർന്നാണ് വിതുര ആശുപത്രിയിൽ നിന്ന് തിരുവനന്തപുരം മെഡിക്കൽ കോളജിലേക്ക് മാറ്റിയത്.
സംസ്ഥാനത്ത് കഴിഞ്ഞദിവസം പനി ബാധിച്ച് മൂന്ന് പേരാണ് മരിച്ചത്. അതേസമയം പനി വ്യാപിക്കുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ് നൽകി. സംസ്ഥാനത്ത് ഡെങ്കിപ്പനി ബാധിതരുടെയും പകർച്ചപ്പനി ബാധിതരുടെയും എണ്ണം അടിക്കടി വർദ്ധിക്കുകയാണ്. മാത്രമല്ല എലിപ്പനി, എച്ച്1എൻ1 എന്നിവയ്ക്കൊപ്പം ചിക്കൻപോക്സ് ഉൾപ്പെടെയുള്ള രോഗങ്ങളും പകരുന്നുണ്ട്.
