ചെന്നൈ: രാജ്യത്തിന്റെ അഭിമാനദൗത്യമായ ചന്ദ്രയാൻ-3 വിക്ഷേപണത്തിന് മുന്നോടിയായി കൗണ്ട് ഡൗൺ ആരംഭിച്ചു. ശ്രീഹരിക്കോട്ട സതീഷ് ധവാൻ സ്പേസ് സെന്ററിലാണ് വിക്ഷേപണത്തിന് മുന്നോടിയായുള്ള കൗണ്ട് ഡൗൺ ആരംഭിച്ചത്. 25 മണിക്കൂർ 30 മിനിറ്റ് നീളുന്ന കൗണ്ട്ഡൗൺ ഇന്ന് ഉച്ചയ്ക്ക് 1.05-നാണ് ആരംഭിച്ചത്. വെള്ളിയാഴ്ച ഉച്ചയ്ക്ക് 2.35-നാകും ഇന്ത്യയുടെ അഭിമാനദൗത്യമായ ചന്ദ്രയാൻ-3 കുതിച്ചുയരുക.
പദ്ധതിയുടെ അവസാനഘട്ട പരിശോധനകൾ എല്ലാം തന്നെ കഴിഞ്ഞ ദിവസം നടന്നിരുന്നു. എല്ലാ ഘട്ടങ്ങളും കൃത്യമാണെന്ന് ഒരിക്കൽ കൂടി പരിശോധിച്ച് അവലോകനം നടത്തുന്ന മിഷൻ റെഡിനസ് റിവ്യൂ അഥവാ എംആർആർ ആണ് നടന്നത്. ഇതിന് ശേഷം ഐഎസ്ആർഒ ചെയർമാനും ഐഎസ്ആർഒയുടെ കീഴിലുള്ള സ്ഥാപനങ്ങളുടെ ഡയറക്ടർമാരും ഉൾപ്പെടുന്ന വിക്ഷേപണ അംഗീകാര ബോർഡായ ലോഞ്ച് ഓതറൈസേഷൻ ബോർഡ് വിക്ഷേപണത്തിന് അനുമതി നൽകിയിരുന്നു.
ദൗത്യത്തിന് മുന്നോടിയായി ഐഎസ്ആർഒയിലെ ശാസ്ത്ര സംഘം ആന്ധ്രാപ്രദേശിലെ തിരുപ്പതി ക്ഷേത്രത്തിൽ ദർശനം നടത്തിയിരുന്നു. ചന്ദ്രയാൻ-3 പേടകത്തിന്റെ മിനിയേച്ചർ മോഡലുകളുമായാണ് ശാസ്ത്രജ്ഞർ പ്രാർത്ഥനയ്ക്കെത്തിയത്.
