കുറഞ്ഞ ചെലവിൽ പ്രശസ്തമായ സ്ഥലങ്ങൾ സന്ദർശിക്കാൻ ഇന്ത്യൻ റെയിൽവേ അവസരമൊരുക്കുന്നുണ്ട്. ടൂറിസ്റ്റ് ട്രെയിനുകളായ ഭാരത് ഗൗരവ് ട്രെയിനിൽ വഴിയാണ് സഞ്ചാരികൾക്ക് കുറഞ്ഞ ചെലവിൽ എല്ലാ വിധ സഹായങ്ങളോടെയും യാത്രകൾ സംഘടിപ്പിക്കുന്നത്. ഇന്ത്യയിൽ പ്രധാനമായും കണ്ടിരിക്കേണ്ട സ്ഥലങ്ങളിലൂടെ എല്ലാം തന്നെ വിവിധ പാക്കേജുകൾ പ്രഖ്യാപിച്ച് ഭാരത് ഗൗരവ് ട്രെയിൻ സർവീസ് നടത്താറുണ്ട്. ഇപ്പോഴിതാ, കടൽ കടന്നും യാത്രയ്ക്ക് സൗകര്യമൊരുക്കുകയാണ് ഐആർസിടിസി.
പ്രകൃതി സ്നേഹികൾ മുതൽ സാഹസിക സഞ്ചാരികൾ വരെ ഒരേ രീതിയിൽ ഇഷ്ടപ്പെടുന്ന ചുരുക്കം ചില സ്ഥലങ്ങളിൽ ഒന്നാണ് ഇന്തോനേഷ്യയിലെ ബാലി. ഇന്ത്യയിൽ നിന്ന് അധികം ചെലവില്ലാതെ പോയിവരാവുന്ന ഒരിടമാണ് ഇതെന്ന പ്രത്യേകതയുമുണ്ട്. എന്നാൽ അതിലും കുറഞ്ഞ ചെലവിൽ ട്രെയിനിൽ പോകാൻ അവസരം ലഭിച്ചാലോ! സഞ്ചാരപ്രേമികൾക്കായി ബാലി ടൂർ പാക്കേജ് പ്രഖ്യാപിച്ചിരിക്കുകയാണ് ഐആർസിടിസി.
ബാലിയിലെ പ്രധാന വിനോദ സഞ്ചാര കേന്ദ്രങ്ങൾ സന്ദർശിക്കാനുള്ള അവസരമുണ്ടാകും. അഞ്ച് രാത്രിയും ആറ് പകലും ഉൾപ്പെടുന്നതാണ് ബാലി പാക്കേജ്. ഉൾവാത്ത ക്ഷേത്രം, കിന്റമണി വില്ലേജ്, ഉബുദ് കോഫി പ്ലാന്റേഷൻ, ഉബുദ് റോയൽ പാലസ്, ഉബുദ് പരമ്പരാഗത ആർട്ട് മാർക്കറ്റ്, ബാലി സഫാരി & മറൈൻ പാർക്ക് വിത്ത് ജംഗിൾ ഹോപ്പർ പാസ്, തൻജംഗ് ബെനോവ ബീച്ച്, ടർട്ടിൽ കൺസർവേഷൻ ഐലൻഡ്, താനൂർ ലോട്ട് എന്നിവ ഉൾപ്പെടുന്നതാണ് പാക്കേജ്.
ബാലിയിലെ ഫോർ സ്റ്റാർ ഹോട്ടലിൽ നാല് രാത്രികൾക്കുള്ള താമസ സൗകര്യവും പാക്കേജിൽ ഉൾപ്പെടുന്നു. മൂന്ന് നേരത്തെ ആഹാരവും ഇതിൽ ഉൾപ്പെടുന്നു. സന്ദർശിക്കുന്ന സ്ഥലങ്ങളിൽ പ്രവേശന ഫീസും, മടക്കയാത്രയ്ക്കായി എയർ ഏഷ്യ എയർലൈൻസിൽ ടിക്കറ്റും പാക്കേജിൽ ഉൾപ്പെടുത്തിയിട്ടുണ്ട്. ഭാഷ കൈകാര്യം ചെയ്യുന്നതിനായി ഇംഗ്ലീഷിൽ പ്രാവീണ്യമുള്ള ഗൈഡിനെയും യാത്രക്കാർക്ക് നൽകുന്നു. വിസ നിരക്കുകൾ പാക്കേജിൽ ഉൾപ്പെടുത്തിയിട്ടില്ല.
92,000 രൂപ മുതലാണ് പാക്കേജ് ആരംഭിക്കുന്നത്. ലക്നൗവിൽ നിന്നാണ് യാത്ര ആരംഭിക്കുന്നത്. ഇരട്ട, ട്രിപ്പിൾ ഒക്യുപ്പൻസിക്ക് ഒരാൾക്ക് 92,700 രൂപയും സിഗ്നൽ ഒക്യുപ്പൻസിക്ക് 1,01,400 രൂപയുമാണ്. കുട്ടികളുമായി യാത്രചെയ്യുന്നവർക്ക് അധിക ബെഡ് സൗകര്യവുമുണ്ട്. അഞ്ച് മുതൽ 11 വരെ പ്രായമുള്ള കുട്ടികൾക്ക് 88,000 രൂപയാണ് നിരക്ക്. അധിക ബെഡ് സൗകര്യം ആവശ്യമില്ലാതെ, കുട്ടികളുമായി യാത്ര ചെയ്യുന്നവർക്ക് 82550 രൂപയാണ് യാത്ര നിരക്ക്. രണ്ട് വയസ്സിന് താഴെയുള്ള കുട്ടികൾക്കും ടിക്കറ്റ് നിരക്ക് ഈടാക്കുന്നതായിരിക്കും. കൂടാതെ വിമാനത്താവളത്തിൽ ചെക്ക് ഇൻ ചെയ്യുമ്പോൾ വിനോദസഞ്ചാരികൾ എയർലൈൻ കൗണ്ടറിൽ നേരിട്ട് പണം നൽകേണ്ടതുണ്ട്. പാക്കേജിൽ നിന്ന്് അഞ്ച് ശതമാനം തുക ഇൻകം ടാക്സ് അക്കൗണ്ടിൽ നിക്ഷേപിക്കും.
ഡൽഹിയിൽ നിന്നും കൊൽക്കത്തയിൽ നിന്നും ബാലി പാക്കേജുകൾ ഐആർസിടിസി നടത്തുന്നുണ്ട്. ഇരട്ട, ട്രിപ്പിൾ ഒക്യുപ്പൻസിക്ക് ഒരാൾക്ക് 92,500 രൂപയാണ് നിരക്ക്. സിംഗിൾ ഒക്യുപ്പെൻസിയ്ക്ക് 99,005 രൂപയാണ് നിരക്ക്. 82,000 രൂപ മുതലാണ് കൊൽക്കത്ത-ബാലി പാക്കേജ് ആരംഭിക്കുന്നത്. ഇരട്ട, ട്രിപ്പിൾ ഒക്യുപ്പെൻസിയ്ക്കാണ് ഈ നിരക്ക്. സിംഗിൾ ഒക്യുപെൻസിയ്ക്ക് 93,000 രൂപയുമാണ് ഈടാക്കുന്നത്. ലക്നൗ-ബാലി ടൂർ , ഓഗസ്റ്റ് 11-ന് ആരംഭിച്ച് 16-ന് തിരികെ പുറപ്പെടും വിധമാണ് സജ്ജമാക്കിയിരിക്കുന്നത്. എയർ ഏഷ്യ വിമാനത്തിൽ 35 പേർക്കാണ് യാത്ര സൗകര്യം.
