ജിയോ ആരാധകർക്ക് ഒരു സന്തോഷവാർത്തയായിട്ടാണ് റിലയൻസ് ഇപ്പോൾ രംഗത്തെത്തിയിരിക്കുന്നത്. ഇന്ത്യൻ ലാപ്ടോപ്പ് വിപണി ലക്ഷ്യം വെച്ചുകൊണ്ട് പുതിയ ജിയോബുക്ക് ജൂലൈ 31-ന് രാജ്യത്ത് അവതരിപ്പിക്കും. കമ്പനി കഴിഞ്ഞ ഒക്ടോബർ മാസത്തിൽ അവതരിപ്പിച്ച ലാപ്ടോപ്പിന്റെ പുതുക്കിയ പതിപ്പായിരിക്കും ഇതെന്നും, പഴയ ലാപ്ടോപ്പ് ആമസോൺ വഴി വിൽപ്പന നടത്താനുള്ള നീക്കത്തിന്റെ ടീസറായിരിക്കും ഇതെന്നുമാണ് സൂചനകൾ.
പുതിയ ജിയോബുക്ക് സവിശേഷതകൾ
ഈ മാസം അവസാനത്തോടെ ‘ ഓൾ-ന്യു ജിയോബുക്ക് ‘ ലോഞ്ച് ചെയ്യുമെന്നാണ് ആമസോൺ പുറത്തുവിട്ട വിവരം. അതേ സമയം നിലവിലെ ജിയോബുക്ക് റിലയൻസ് ഡിജിറ്റൽ സ്റ്റോറുകൾ വഴി മാത്രമാണ് വിൽപ്പന നടത്തുന്നത്.
കോംപാക്ട് ഫോം ഫാക്ടറുള്ള പുതിയ ജിയോബുക്ക് നീലനിറത്തിലാണ് പുറത്തിറങ്ങുന്നത്. ഈ ലാപ്ടോപ്പ് എല്ലാ പ്രായക്കാർക്കും ഉപയോഗിക്കാവുന്നതും പ്രൊഡക്റ്റിവിറ്റി, വിനോദം, ഗെയിം എന്നിവയ്ക്കായി ഡിസൈൻ ചെയ്തിട്ടുള്ളതാണെന്നും ടീസറിൽ നൽകിയിട്ടുണ്ട്. 4ജി കണക്റ്റിവിറ്റിയുള്ള ഈ ലാപ്പിന്റെ പെർഫോമൻസ് മെച്ചപ്പെട്ടതായിരിക്കും. ഒക്ടാ കോർ പ്രോസസറുള്ള ജിയോബുക്കിൽ ഹൈ-ഡെഫനിഷൻ വീഡിയോകൾ സ്ട്രീം ചെയ്യാനുള്ള സ്ക്രീനും ഉണ്ടായിരിക്കും. ഒരു ദിവസം വരെ നീണ്ട് നിൽക്കുന്ന ബാറ്ററിയായിരിക്കും ഈ ലാപ്പിൽ ഉണ്ടാവുക.
