കൊച്ചി: കൊമ്പൻമാരുടെ ആശാൻ ആരാധകരുടെ കാത്തിരിപ്പിന് വിരാമമിട്ട് കൊച്ചിയിലെത്തി. ഇന്ന് രാവിലെ എമിറേറ്റ്സ് വിമാനത്തിലാണ് ഇവാൻ വുക്കോമനോവിച്ച് കൊച്ചിയിലെത്തിയത്. കൊച്ചി പനമ്പിളളിയിൽ ബ്ലാസ്റ്റേവസിന്റെ പ്രീസീസൺ ക്യാമ്പ് ആരംഭിച്ചിട്ടും സെർബിയൻ കോച്ച് ടീമിനൊപ്പം ചേരാത്തത് ഒട്ടേറെ അഭ്യൂഹങ്ങൾക്ക് ഇടവരുത്തിയിരുന്നു.
കഴിഞ്ഞ സീസണിൽ പ്ലേഓഫിൽ ബെംഗളൂരു എഫ് സിയുമായുളള മത്സരം ബഹിഷ്കരിച്ചതിനെ തുടർന്ന് ലഭിച്ച വിലക്കിനെയും പിഴയെയും ചുറ്റിപ്പറ്റിയായിരുന്നു ആരാധകരുടെ ആശങ്കകൾ.മത്സരം ഉപേക്ഷിച്ചിന് ബ്ലാസ്റ്റേഴ്സ് നിരത്തിയ വാദങ്ങൾ തള്ളിയാണ് എഐഎഫ്എഫ് കമ്മിറ്റി ക്ലബ്ബിനെതിരെയുളള ശിക്ഷാ നടപടികൾ പ്രഖ്യാപിച്ചത്. കളത്തിന് പുറത്തേക്കു ടീമിനെ നയിച്ച കോച്ചിന്റെ നടപടിയെയും മുൻ താരങ്ങൽ വിമർശിച്ചിരുന്നു. ഈ സംഭവങ്ങളുടെ പശ്ചാത്തിലാണ് കോച്ച് എത്താൻ വൈകുന്നതെന്നായിരുന്നു ആരാധകർ പോലും പങ്കിട്ട ആശങ്ക.
കേരള ബ്ലാസ്റ്റേഴ്സ് കോച്ച് ഇവാൻ വുക്കോമനോവിച്ച് ടീം വിട്ടെന്ന് ഉൾപ്പെടെയുളള കഥകൾ ഉയർന്നതിനൊടുവിലാണ് അപ്രതീക്ഷിതമായി ആരാധകരുടെ ആശാൻ കൊച്ചിയിലെത്തിയത്.ബ്ലാസ്റ്റേഴ്സിനൊപ്പം ഇതു മൂന്നാമത്തെ സീസണിനാണ് സെർബിയൻ കോച്ചിന്റേത്. പ്രഥമ സീസണിൽ ടീമിനെ ഫൈനലിലേക്കും രണ്ടാം സീസണിൽ പ്ലേഓഫിലേക്കും നയിച്ച വുക്കോമനോവിച്ച് ബ്ലാസ്റ്റേഴ്സിന് ഏറ്റവും കൂടുതൽ വിജയങ്ങൾ സമ്മാനിച്ച പരിശീലകനാണ്.
Comments