ടോറൊണ്ടോ: ഫിറ്റ്നസ് ചലഞ്ചിൽ പങ്കെടുത്ത് അമിതമായി വെള്ളം കുടിച്ച ടിക്ടോക് താരം ആശുപത്രിയിൽ. കനേഡിയൻ ടിക്ടോക് താരം മിഷേൽ ഫെയർബേണിനെയാണ് ആശുപത്രിയിൽ പ്രവേശിപ്പിച്ചിരിക്കുന്നത്. അമിതമായി വെള്ളം കുടിച്ചതോടെ മിഷേലിന്റെ ശരീരത്തിലെ സോഡിയത്തിന്റെ അംശം കുറയുകയായിരുന്നു.
വൈറലായ 75 ഹാർഡ് എന്ന ഫിറ്റ്നസ് ചലഞ്ചായിരുന്നു മിഷേൽ നടത്തിയത്. ഇതിൽ 75 ദിവസം നാല് ലിറ്റർ വെള്ളം വീതം കുടിച്ച് ഡയറ്റ് പിന്തുടരുകയാണ് ചെയ്യേണ്ടത്. ഇതിന് പുറമേ 45 മിനിറ്റ് വർക്ക് ഔട്ടും ചെയ്യേണ്ടതുണ്ട്. മദ്യവും കൊഴുപ്പ് അടങ്ങിയ മറ്റ് ആഹാരപദാർഥങ്ങൾ ഒഴിവാക്കുക എന്നതും ചലഞ്ചിന്റെ നിയമാവലിയിൽ പറയുന്നു.ഇതിന് പുറമേ പതിവ് ഫിറ്റ്നസ് ചലഞ്ചിൽ നിന്നും വ്യത്യസ്തമായി ഏതെങ്കിലും പുസ്തകത്തിന്റെ പത്ത് പേജുകൾ വായിക്കുവാനും നിർദ്ദേശമുണ്ടായിരുന്നു.
ഫിറ്റ്നസ് ചലഞ്ച് ആവശ്യപ്പെട്ട് 12 ദിവസം പിന്നിട്ടപ്പോഴേക്കും മിഷേലിന് ശാരീരിക അസ്വസ്ഥതകൾ അനുഭവപ്പെടുകയായിരുന്നു. തുടർന്ന് അമിത ക്ഷീണത്തിലേക്കും ഛർദ്ദിയിലേക്കും കാര്യങ്ങൾ നീങ്ങി. രാത്രിയിൽ ഉറങ്ങുന്നതിനോ ഭക്ഷണം കഴിക്കുന്നതിനോ ഒന്നും തന്നെ സാധിച്ചില്ലെന്നും മിഷേൽ പറയുന്നു. അമിത അളവിൽ ജലം ശരീരത്തിൽ എത്തിയപ്പോൾ സോഡിയത്തിന്റെ അളവ് ക്രമാതീതമായി കുറഞ്ഞു. ഇതാണ് മിഷേലിന്റെ ആരോഗ്യ പ്രശ്നത്തിന് കാരണമെന്ന് ഡോക്ടർമാർ വ്യക്തമാക്കി. നാല് ലിറ്റർ വെള്ളം ഒരു ദിവസം കുടിക്കരുതെന്നും അര ലിറ്റർ വെള്ളം കുടിക്കാവൂ എന്നും ഡോക്ടർമാർ ഇദ്ദേഹത്തിന് നിർദ്ദേശം നൽകി.
