കളിക്കളത്തിൽ പുത്തൻ അതിഥി! ഞെട്ടിക്കാനൊരുങ്ങി വോൾവോയുടെ പുത്തൻ ഇലക്ട്രിക് കാർ; വിപണി കീഴടക്കാൻ സി40  സെപ്റ്റംബറിലെത്തും

ഇലക്ട്രിക് കാർ വിപണി കീഴടക്കാൻ പുത്തൻ മോഡലുമായി വോൾവോ. വോൾവോ സി40 സെപ്റ്റംബർ നാലിന് വിപണിയിലെത്തുമെന്ന് കമ്പനി വ്യക്തമാക്കി. എക്സി 40 റീചാർജ് എന്ന വാഹനത്തിന് പിന്നാലെ വോൾവോ പുറത്തിറക്കുന്ന രണ്ടാമത്തെ വാഹനമാണ് ഇത്. ഒറ്റ ടോപ്പ്-സ്പൈക്ക് വേരിയന്റിൽ മാത്രമാണ് വോൾവോ സി40 ഇന്ത്യയിലെത്തുന്നത്.

ആറ് കളർ വേരിയന്റുകളിൽ വാഹനം ലഭ്യമാകും. ക്രിസ്റ്റൽ വൈറ്റ്, ഓനിക്സ് ബ്ലാക്ക്, ഫ്യൂഷൻ റെഡ്, ക്ലൗഡ് ബ്ലൂ, സേജ് ഗ്രീൻ, ഫ്യോർഡ് ബ്ലൂ എന്നിവയാണ് ഈ വാഹനത്തിന്റെ കളർ ഓപ്ഷനുകൾ. വാഹനത്തിന്റെ ക്യാബിനിൽ ബ്ലാക്ക് തീം ആണ് നൽകിയിരിക്കുന്നത്. ഡാഷ്‌ബോർഡിൽ ഒൻപത് ഇഞ്ച് വെർട്ടിക്കൽ ടച്ച് സ്‌ക്രീൻ ഇൻഫോടെയ്ൻമെന്റ് സിസ്റ്റവും നൽകിയിരിക്കുന്നു. എൽഇഡി ഹെഡ്‌ലാമ്പുകളും കമ്പനി നൽകിയിട്ടുണ്ട്.

വോൾവോ സി40-ൽ 78 kWh ബാറ്ററി പായ്‌ക്കാണ് കമ്പനി നൽകിയിരിക്കുന്നത്. ഡ്യുവൽ-ഇലക്ട്രിക് മോട്ടോർ സെറ്റപ്പുമായി വരുന്ന വോൾവോ സി40 405 ബിഎച്ച്പി പവറും 660 എൻഎം പീക്ക് ടോർക്കും ഉത്പാദിപ്പിക്കുന്നു. ഒരു തവണ ചാർജ് ചെയ്താൽ 530 കിലോമീറ്റർ വരെ സഞ്ചരിക്കാമെന്നതാണ് ഈ വാഹനത്തിന്റെ പ്രത്യേകത. 27 മിനിറ്റിൽ 10 മുതൽ 80 ശതമാനം വരെ ചാർജ് ചെയ്യാൻ കഴിയുന്ന ഫാസ്റ്റ് ചാർജറും വോൾവോ നൽകുന്നു. 56.90 ലക്ഷം മുതലാണ് എക്‌സി 40യുടെ വില ആരംഭിക്കുന്നത്. അതുകൊണ്ട് തന്നെ സി40-യുടെ വില ഇതിലും ഉയരാനാണ് സാധ്യത. വില പുറത്തുവിട്ടതിന് ശേഷം വോൾവോയുടെ ഔദ്യോഗിക വെബ്‌സൈറ്റിൽ തന്നെ ഓർഡർ ചെയ്യാവുന്നതാണെന്നും കമ്പനി അറിയിച്ചിട്ടുണ്ട്.