മുംബൈ: ഇന്ത്യൻ ക്രിക്കറ്റ് താരം സർഫറാസ് ഖാൻ വിവാഹിതനായി. സമൂഹമാദ്ധ്യമങ്ങളിലൂടെ സർഫറാസ് ഖാൻ തന്നെയാണ് ഇക്കാര്യം അറിയിച്ചത്. വധു റൊമാന ജാഹുർ ജമ്മു കാശ്മീരിലെ ഷോപിയാൻ സ്വദേശിനിയാണ്. വിവാഹം കശ്മീരിൽവച്ചു നടത്താനാണു നിയോഗമെന്ന് കാശ്മീരി മാദ്ധ്യമങ്ങളോട് സർഫറാസ് പറഞ്ഞു.
ഇന്ത്യൻ ജേഴ്‌സിയിൽ കളത്തിലിറങ്ങുമോയെന്ന മാദ്ധ്യമപ്രവർത്തകരുടെ ചോദ്യത്തിന് ദൈവം തീരുമാനിച്ചാൽ ഇറങ്ങുമെന്നും മറുപടിയായി സർഫറാസ് പറഞ്ഞു. താരത്തിന് സമൂഹമാദ്ധ്യമങ്ങളിൽ ആശംസകളുമായി വെസ്റ്റിൻഡീസ് ക്രിക്കറ്റ് താരം ക്രിസ് ഗെയ്ൽ, ഇന്ത്യൻ താരങ്ങളായ ഋതുരാജ് ഗെയ്ക്വാദ്, സൂര്യകുമാർ യാദവ്, തിലക് വർമ, അക്ഷർ പട്ടേൽ എന്നിവരെത്തി. 25 വയസ്സുകാരനായ സർഫറാസ് ഐപിഎല്ലിൽ പഞ്ചാബ് കിങ്‌സ്, റോയൽ ചാലഞ്ചേഴ്‌സ് ബാംഗ്ലൂർ, ഡൽഹി ടീമുകൾക്കു വേണ്ടി കളിച്ചിട്ടുണ്ട്.
ആഭ്യന്തര ക്രിക്കറ്റിൽ തകർപ്പൻ ഫോമിലാണ് സർഫറാസ് കഴിഞ്ഞ കുറച്ചു സീസണുകളിലായി കളിക്കുന്നത്. അവസാന മൂന്ന് രഞ്ജി ട്രോഫി ടൂർണമെന്റുകളിൽ 2566 റൺസ് താരം സ്‌കോർ ചെയ്തു. ഫസ്റ്റ് ക്ലാസ് ക്രിക്കറ്റിൽ 79.65 ആണ് താരത്തിന്റെ ശരാശരി. എന്നാൽ ഐപിഎല്ലിൽ പ്രതീക്ഷയ്‌ക്കൊത്ത് ഉയരാൻ താരത്തിന് കഴിഞ്ഞില്ല. താരത്തെ ഇന്ത്യൻ ക്രിക്കറ്റ് ടീമിൽ ഉൾപ്പെടുത്താതതിൽ സെലക്ടർമാർക്ക് വൻ വിമർശനം നേരിടേണ്ടി വന്നത്.
