ബർമിംഗ്ഹാം: ഇന്ത്യൻ ബ്ലൈന്റ് സ്പോർട്ട്സ് ഫെഡറേഷൻ ക്രിക്കറ്റിൽ ഇന്ത്യൻ വനിതാ ക്രിക്കറ്റ് ടീമിന് കിരീടം. ഫൈനലിൽ ഓസ്ട്രേലിയയെ പരാജയപ്പെടുത്തിയാണ് ഇന്ത്യയുടെ മിന്നും വിജയം. 9 വിക്കറ്റിനാണ് ഇന്ത്യ ഓസ്ട്രേലിയയെ പരാജയപ്പെടുത്തിയത്. ഇതോടെ ഐബിഎസ്എഎഫിലെ ആദ്യ ക്രിക്കറ്റ് ജേതാക്കളായി ഇന്ത്യ മാറി. അസാധാരണമായ പ്രതിരോധമാണ് മത്സരത്തിൽ ഇന്ത്യൻ ടീം പുറത്തെടുത്തത്. ഓസ്ട്രേലിയയെ 8 വിക്കറ്റിന് 114 റൺസ് എന്ന സ്ക്കോറിൽ ഇന്ത്യ ഒതുക്കി.
ആദ്യ കളിയിൽ ഇംഗ്ലണ്ടിനെ നേരിട്ട ഇന്ത്യ തകർപ്പൻ പ്രകടനമാണ് കാഴ്ചവെച്ചത്. 20 ഓവറിൽ 2 വിക്കറ്റ് നഷ്ടത്തിൽ 268 റൺസാണ് ഇന്ത്യ നേടിയത്. എന്നാൽ 185 റൺസിലേക്ക് ഇംഗ്ലീഷ് ടീമിന് ഒതുങ്ങേണ്ടി വന്നു. 60 പന്തിൽ നിന്ന് 117 റൺസ് നേടിയ ഗംഗവ്വ എച്ചിന്റെ മികച്ച പ്രകടനമാണ് ഇന്ത്യയെ ഇംഗ്ലണ്ടിനെതിരെയുള്ള വിജയത്തിലേക്ക് നയിച്ചത്.
അതേസമയം, കാഴ്ചപരിമിതിയുള്ള പുരുഷന്മാരുടെ ഫൈനലിൽ ഇന്ത്യയും പാക്കിസ്ഥാനും തമ്മിലാണ് ഏറ്റുമുട്ടുന്നത്. ഇന്ത്യയുടെ പുരുഷ ടീം ബംഗ്ലാദേശിനെതിരെ മികച്ച പ്രകടനമാണ് പുറത്തെടുത്തത്. 7 വിക്കറ്റിന് ബംഗ്ലാദേശിനെ ഇന്ത്യ പരാജയപ്പെടുത്തി ഫൈനലിലെത്തി. 6 വിക്കറ്റിന് 144 റൺസ് എന്ന നിലയിൽ ഇന്ത്യ ബംഗ്ലാദേശിനെ ഒതുക്കുകയായിരുന്നു.
