തിരുവനന്തപുരം: വാഴോട്ടുകോണം കൗൺസിലർ ആർ. സുഗതനെ കാപ്പ നിയമപ്രകാരം തടങ്കലിലാക്കിയ നടപടി രാഷ്‌ട്രീയ ലക്ഷ്യത്തോടെയുള്ളതാണെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ എംഎൽഎ. പൊലീസിനെ ദുരുപയോഗം ചെയ്ത് സുഗതനെതിരെ കള്ളക്കേസെടുക്കുകയായിരുന്നുവെന്ന് തെളിഞ്ഞതായും അദ്ദേഹം ആരോപിച്ചു.
സുഗതന്റെ കാപ്പ തടങ്കൽ ഹൈക്കോടതി റദ്ദാക്കി ജയിൽമോചിതനായതിന് പിന്നാലെയാണ് രാജീവ് ചന്ദ്രശേഖറിന്റെ പ്രതികരണം. പിണറായി വിജയൻ സർക്കാരിന്റെ കാലത്ത് കെട്ടിച്ചമച്ച കേസ് പിന്നീട് വി.ഡി. സതീശൻ സർക്കാർ തുടരുകയായിരുന്നുവെന്ന് അദ്ദേഹം പറഞ്ഞു
രാഷ്‌ട്രീയ ലക്ഷ്യത്തോടെ തിരുവനന്തപുരം നഗരസഭാ ഭരണം അട്ടിമറിക്കുകയെന്ന ലക്ഷ്യത്തോടെയാണ് സുഗതനെതിരെ കേസെടുത്ത് ജയിലിലടച്ചതെന്നും രാജീവ് ചന്ദ്രശേഖർ പറഞ്ഞു. ഇതിന് പിന്നിലെ ആസൂത്രിത നീക്കം ജനങ്ങൾ തിരിച്ചറിയണമെന്നും അദ്ദേഹം ആവശ്യപ്പെട്ടു.
മന്ത്രിമാർക്കെതിരെ പ്രതിഷേധിച്ചതിന് പൊലീസ് അറസ്റ്റ് ചെയ്ത യുവമോർച്ച പ്രവർത്തകർക്ക് ജാമ്യം ലഭിച്ചതിനെ തുടർന്ന് അവരെ സ്വീകരിക്കാൻ പൂജപ്പുര ജയിലിലെത്തിയപ്പോഴായിരുന്നു രാജീവ് ചന്ദ്രശേഖറിന്റെ പ്രതികരണം.
‘എൽഡിഎഫ് ചെയ്തതുതന്നെ യുഡിഎഫും തുടരുന്നു’
കേരളത്തിലെ രാഷ്‌ട്രീയ സാഹചര്യത്തെയും അദ്ദേഹം വിമർശിച്ചു. ഒരു വശത്ത് രാഹുൽ ഗാന്ധി ഭരണഘടനയെയും ജനാധിപത്യത്തെയും കുറിച്ച് സംസാരിക്കുമ്പോൾ കേരളത്തിൽ നടക്കുന്നത് എന്താണെന്ന് ജനങ്ങൾക്ക് വ്യക്തമായിട്ടുണ്ടെന്നും രാജീവ് ചന്ദ്രശേഖർ പറഞ്ഞു
പൊലീസിനെ ദുരുപയോഗം ചെയ്ത് രാഷ്‌ട്രീയ എതിരാളികൾക്കെതിരെ നടപടിയെടുക്കുന്ന രീതിയാണ് സിപിഎം സർക്കാർ പത്ത് വർഷം പിന്തുടർന്നതെന്നും അതേ സമീപനം തന്നെയാണ് വി.ഡി. സതീശന്റെ നേതൃത്വത്തിലുള്ള സർക്കാർ തുടരുന്നതെന്നും അദ്ദേഹം ആരോപിച്ചു.
കൊല്ലത്ത് കേന്ദ്ര ആഭ്യന്തരമന്ത്രി അമിത് ഷായുടെ സുരക്ഷ അട്ടിമറിക്കാൻ ശ്രമിച്ചെന്നാരോപിച്ച് അറസ്റ്റിലായ യൂത്ത് കോൺഗ്രസ് പ്രവർത്തകർക്ക് അന്നുതന്നെ ജാമ്യം ലഭിച്ചുവെന്നും രാജീവ് ചന്ദ്രശേഖർ ചൂണ്ടിക്കാട്ടി.
അതേസമയം, ബിജെപി സംസ്ഥാന കമ്മിറ്റി ഓഫീസിന് നേരെയുണ്ടായ ആക്രമണത്തിൽ ഇതുവരെ കുറ്റക്കാരെ കണ്ടെത്താൻ പൊലീസിന് കഴിഞ്ഞിട്ടില്ലെന്നും അദ്ദേഹം വിമർശിച്ചു.
