പത്തനംതിട്ട: തിരുവോണ പൂജകളുടെ ഭാഗമായി ശബരിമല നട ഇന്ന് തുറക്കും. വൈകിട്ട് അഞ്ച് മണിയോടെ തന്ത്രി കണ്ഠരര് മഹേഷ് മോഹനരുടെ സാന്നിദ്ധ്യത്തിൽ മേൽശാന്തി കെ ജയരാമൻ നമ്പൂതിരി സന്നിധാനത്ത് നട തുറന്ന് ശ്രീലകത്ത് ദീപം തെളിയിക്കും. ഇതിന് ശേഷമാകും ഭക്തജനങ്ങൾക്ക് പതിനെട്ടാം പടി കയറുന്നതിനുള്ള അനുവാദം ലഭിക്കുക.
ഓണനാളുകളിൽ പതിവ് പൂജകൾക്കും വിശേഷാൽ പൂജകൾക്കും പുറമേ ഉത്രാടം മുതൽ ചതയം വരെ ഓണസദ്യയും ഒരുക്കിയിട്ടുണ്ട്. ഉത്രാടനാളിൽ മേൽശാന്തി കെ ജയരാമൻ നമ്പൂതിരി, തിരുവോണത്തിൽ ദേവസ്വം ജീവനക്കാര്, അവിട്ടം നാളിൽ സന്നിധാനം പോലീസ്, ചതയത്തിന് ഒരു ഭക്തൻ എന്നിവരുടെ വഴിപാടായാണ് ഓണസദ്യ ഒരുക്കുന്നത്.
