തിരുവനന്തപുരം: 2026 മാര്‍ച്ചില്‍ നടന്ന ഒന്നാം വര്‍ഷ ഹയര്‍സെക്കന്‍ഡറി (പ്ലസ് വണ്‍) പരീക്ഷയുടെ ഫലം വിദ്യാഭ്യാസ വകുപ്പ് പ്രഖ്യാപിച്ചു. പരീക്ഷയെഴുതിയ 4,10,190 വിദ്യാര്‍ത്ഥികളില്‍ 4,04,722 പേരുടെ ഫലമാണ് പ്രസിദ്ധീകരിച്ചത്. ഇതില്‍ 2,50,981 വിദ്യാര്‍ത്ഥികള്‍ 30 ശതമാനത്തിലധികം മാര്‍ക്ക് നേടി. ഈ വര്‍ഷത്തെ വിജയശതമാനം 62.01 ശതമാനമാണ്. കഴിഞ്ഞ വര്‍ഷം ഇത് 60.76 ശതമാനമായിരുന്നു.
മാര്‍ച്ച് 5 മുതല്‍ 27 വരെയായിരുന്നു പ്ലസ് വണ്‍ പരീക്ഷ നടന്നത്. രണ്ട് തവണ ഫലപ്രഖ്യാപനം മാറ്റിവെച്ച ശേഷമാണ് ഒടുവില്‍ ഫലം പ്രസിദ്ധീകരിച്ചത്. മുന്‍വര്‍ഷങ്ങളില്‍ ജൂണ്‍ ആദ്യവാരത്തില്‍ തന്നെ ഫലം പ്രഖ്യാപിക്കാറുണ്ടായിരുന്നെങ്കിലും ഇത്തവണ പതിവിലും വൈകിയാണ് വിദ്യാര്‍ത്ഥികള്‍ക്ക് ഫലം ലഭിച്ചത്.
ആദ്യഘട്ടത്തില്‍ ജൂണ്‍ 10-ന് ഫലം പ്രഖ്യാപിക്കാനായിരുന്നു തീരുമാനം. പിന്നീട് അത് ജൂലൈ 15-ലേക്ക് മാറ്റി. പശ്ചിമേഷ്യയിലെ സംഘര്‍ഷത്തെ തുടര്‍ന്ന് ഗള്‍ഫ് മേഖലയില്‍ പരീക്ഷ നിശ്ചിത സമയത്ത് നടത്താന്‍ കഴിയാതിരുന്നതും, അവിടെ പ്രത്യേകമായി നടത്തിയ പരീക്ഷയുടെ മൂല്യനിര്‍ണയം പൂര്‍ത്തിയാക്കേണ്ടിവന്നതുമാണ് ഫലപ്രഖ്യാപനം വൈകാന്‍ പ്രധാന കാരണമായത്.
ഇതിനിടെ ദേശീയതലത്തില്‍ സര്‍ക്കാര്‍ വെബ്സൈറ്റുകള്‍ക്ക് നേരെ സൈബര്‍ ആക്രമണശ്രമങ്ങള്‍ ഉണ്ടായതിനെ തുടര്‍ന്ന് സുരക്ഷാ പരിശോധനകള്‍ ശക്തമാക്കിയിരുന്നു. ഇതുമൂലം ഫലം പ്രസിദ്ധീകരിക്കുന്നതില്‍ ചെറിയ സാങ്കേതിക കാലതാമസം ഉണ്ടായതായി പരീക്ഷാ ചുമതലയുള്ള ജോയിന്റ് ഡയറക്ടര്‍ അറിയിച്ചു.
ഉച്ചയ്‌ക്ക് 3 മണിക്ക് ഫലം ലഭ്യമാകുമെന്ന് അറിയിച്ചിരുന്നെങ്കിലും, സുരക്ഷാ പരിശോധനകള്‍ പൂര്‍ത്തിയാക്കിയ ശേഷമാണ് സര്‍ക്കാര്‍ വെബ്സൈറ്റുകളില്‍ ഫലം പ്രസിദ്ധീകരിച്ചത്. വിദ്യാര്‍ത്ഥികള്‍ക്ക് ഔദ്യോഗിക ഫലം വിദ്യാഭ്യാസ വകുപ്പിന്റെ ഫലം പ്രസിദ്ധീകരിക്കുന്ന പോര്‍ട്ടലുകളില്‍ പരിശോധിക്കാം.
