ഹൈദരാബാദ്: വ്യത്യസ്ത കേസുകളിൽ നിന്നായി 11 കിലോ സ്വർണവും 1.5 ലക്ഷം രൂപയുടെ വിദേശ കറൺസിയും വിജയവാഡയിൽ കസ്റ്റംസ് പിടികൂടി. ദുബായിയിൽ നിന്നും ശ്രീലങ്കയിൽ നിന്നുമാണ് സ്വർണം കടത്തിയതെന്ന് അന്വേഷണ സംഘം അറിയിച്ചു.
കഴിഞ്ഞ ദിവസം വിജയവാഡയിൽ പിടികൂടിയ ഒരു കാറിൽ നിന്ന് 4.3 കിലോ സ്വർണം പിടികൂടിയിരുന്നു. ചെന്നൈയിൽ നിന്ന് വിജയവാഡയിലേയക്ക് പോവുകയായിരുന്ന കാർ സംശയാസ്പദമായി ബൊപ്പള്ളിയിൽ വെച്ചാണ് പോലീസ് പിടികൂടിയത്. കാറിൽ നിന്നും കുവൈറ്റ് ദിനാർ, ഒമാൻ റിയാൽ, ഖത്തർ റിയാൽ എന്നിവയും പിടിച്ചെടുത്തു.
പിടികൂടിയ സ്വർണത്തിൽ നിന്ന് വിദേശത്ത് നിന്ന് കടത്തിയതാണെന്ന് തെളിയിക്കുന്ന തരത്തിലുള്ള അടയാളങ്ങൾ മായ്ച്ച നിലയിൽ ആയിരുന്നു. ഇങ്ങനെ ചെയ്യുന്നത് സ്വർണക്കടത്തല്ല എന്ന് തെറ്റിദ്ധരിപ്പിക്കാനാണെന്നും അന്വേഷണ സംഘം പറഞ്ഞു. അറസ്റ്റ് ചെയ്ത പ്രതിയെ വിശാഖപട്ടണം കോടതി 13 ദിവസത്തെ ജുഡീഷ്യൽ കസ്റ്റഡിയിൽ റിമാൻഡ് ചെയ്തു. കഴിഞ്ഞ രണ്ട് വർഷത്തിനിടെ വിജയവാഡ കസ്റ്റംസ് (പ്രിവന്റീവ്) കമ്മീഷണറേറ്റ് 40 കോടി രൂപ വിലമതിക്കുന്ന 70 കിലോഗ്രാം കള്ളക്കടത്ത് സ്വർണമാണ് പിടിച്ചെടുത്തത്.
