രാജ്യാന്തര ക്രിക്കറ്റിൽ അരങ്ങേറുന്ന ആദ്യ ട്രാൻസ്ജെൻഡർ താരമാകാൻ ഡാനിയല്ലെ മക്ഗഹേ. വനിത ട്വന്റി20 ക്രിക്കറ്റിൽ കാനഡക്ക് വേണ്ടിയാണ് ഡാനിയല്ലെ കളിക്കളത്തിലിറങ്ങുന്നത്. ട്രാൻസ്ജെൻഡർമാരെ മത്സരത്തിനിറങ്ങാൻ അനുവദിക്കുന്ന യോഗ്യതാ മാനദണ്ഡങ്ങൾ പൂർത്തീകരിച്ചതോടെയാണ് ഡാനിയല്ലെ രാജ്യാന്തര മത്സരങ്ങളിൽ പങ്കെടുക്കാൻ ഐസിസി അനുവദിച്ചത്.
29കാരിയായ മക്ഗഹേ ഓപ്പണിങ് ബാറ്ററാണ്.അടുത്ത വർഷം വനിത ട്വന്റി20 ലോകകപ്പിനുള്ള യോഗ്യത മത്സരങ്ങളിലാകും കാനഡയ്ക്കായി അരങ്ങേറുക. യോഗ്യത മത്സരങ്ങൾക്കുള്ള ടീമിലാണ് താരം ഇടംപിടിച്ചത്.
‘ഞാൻ ആദരിക്കപ്പെട്ടു. എന്റെ കമ്മ്യൂണിറ്റിയെ പ്രതിനിധീകരിക്കാൻ കഴിയുമെന്നത് ഞാൻ സ്വപ്നത്തിൽ പോലും കരുതിയ കാര്യമല്ലായിരുന്നു’ -ഡാനിയല്ലെ പറഞ്ഞു. സീലിനെതിരെയാണ് മക്ഗാഹി ട്വന്റി20 ഇന്റർനാഷനൽ ക്രിക്കറ്റിൽ അരങ്ങേറ്റം കുറിക്കുക. രാജ്യാന്തര ക്രിക്കറ്റ് കൗൺസിലിന്റെ നേതൃത്വത്തിൽ നാലു ടീമുകൾ പങ്കെടുക്കുന്ന അമേരിക്കാസ് ക്വാളിഫയിംഗ് ടൂർണമെന്റിലെ ആദ്യ മത്സരം കനഡയും ബ്രസീലും തമ്മിലാണ്.
2020ൽ ഓസ്ട്രേലിയയിൽ നിന്നാണ് താരം കാനഡയിലേക്ക് കുടിയേറിയത്. ഇതിന് ശേഷമായിരുന്നു പുരുഷനിൽ നിന്ന് സ്ത്രീയിലേക്കുള്ള മാറ്റം. മെഡിക്കൽ ട്രാൻസിഷൻ 2021ൽ ആരംഭിച്ചു.
ഐസിസിയുടെ 2018ൽ പുറത്തിറക്കിയ കളിക്കാരുടെ യോഗ്യതാ ചട്ടങ്ങൾ അനുസരിച്ച് (2021ൽ ഭേദഗതി വരുത്തി) വനിതാ അന്താരാഷ്ട്ര ക്രിക്കറ്റ് കളിക്കാൻ ആഗ്രഹിക്കുന്ന ട്രാൻസ് വനിതകൾ ‘അവരുടെ സെറത്തിലെ ടെസ്റ്റോസ്റ്റിറോണിന്റെ സാന്ദ്രത കുറഞ്ഞത് 12 മാസത്തേക്ക് തുടർച്ചയായി 5 nmol/L1ൽ കുറവാണെന്ന് തെളിയിക്കണം. മത്സരിക്കുന്നത് തുടരുന്നിടത്തോളം കാലം അത് ആ നിലയ്ക്ക് താഴെ നിലനിർത്തുകയും വേണം.
Comments