ക്യാൻസറുമായി പോരാട്ടം നടത്തിയ എനിക്ക് അതിന്റെ ശക്തി എന്താണെന്ന് നന്നായി അറിയാം; ഞാൻ കണ്ടുമുട്ടിയ ഏറ്റവും ശക്തനായ മനുഷ്യനായിരുന്നു ഹീത്ത് സ്ട്രീക്ക്: യുവരാജ്

സിംബാബ്‌വെയുടെ ക്രിക്കറ്റ് ഇതിഹാസവും ദേശീയ ടീമിന്റെ മുന്‍ നായകനുമായിരുന്ന ഹീത്ത് സ്ട്രീക്കിന്റെ അന്ത്യം ക്രിക്കറ്റ് പ്രേമികൾക്ക് ഏറെ വേദനയാണ് നൽകിയത്. ക്യാന്‍സര്‍ ബാധയെ തുടര്‍ന്ന് ചികിത്സയിലിരിക്കെ 49-ാം വയസിലാണ് താരത്തിന്റെ അന്ത്യം. ടെസ്റ്റില്‍ 100 വിക്കറ്റില്‍ അധികം നേടിയ ഒരേയൊരു സിംബാബ്‌വെ ബൗളറും ടെസ്റ്റില്‍ 100 വിക്കറ്റിനൊപ്പം 1000 റണ്‍സ് നേടിയ ആദ്യ താരവുമായിരുന്നു സ്ട്രീക്ക്. ക്യാൻസറിനെതിരെ ധൈര്യപൂർവ്വം പോരാടിയ ഹീത്ത് സ്ട്രീക്കിന് വൈകാരികമായി പ്രണാമം അർപ്പിച്ചിരിക്കുകയാണ് യുവരാജ് സിം​ഗ്.

‘സിംബാബ്‌വെയുടെ ഇതിഹാസ ക്രിക്കറ്റ് താരം ഹീത്ത് സ്ട്രീക്കിന്റെ വിയോഗത്തെക്കുറിച്ചുള്ള വാർത്ത ദുഃഖകരമാണ്. ക്യാൻസറുമായി പോരാട്ടം നടത്തിയ എനിക്ക് അതിന്റെ ശക്തി എന്താണെന്ന് നന്നായി അറിയാം. എന്റെ യാത്രയിൽ ഞാൻ കണ്ടുമുട്ടിയ ഏറ്റവും നല്ല ആളുകളിൽ ഒരാളും ശക്തനായ മനുഷ്യനുമായിരുന്നു അദ്ദേഹം. ഹീത്ത് സ്ട്രീക്കിന്റെ കുടുംബത്തിന്റെയും പ്രിയപ്പെട്ടവരുടെയും മനകരുത്തിനായി ഞാൻ പ്രാർത്ഥിക്കുന്നു’- യുവരാജ് സിം​ഗ് സമൂഹമാദ്ധ്യമങ്ങളിൽ കുറിച്ചു.

1990-കളിലും 2000-ന്റെ തുടക്കവുമായിരുന്നു സ്ട്രീക്കിന്റെ സുവര്‍ണകാലം. ടെസ്റ്റില്‍ ഏഴ് തവണ അഞ്ചുവിക്കറ്റ് കരസ്ഥമാക്കി മിന്നും പ്രകടനം താരം കാഴ്ച വെച്ചിട്ടുണ്ട്. ഏറ്റവും കൂടുതല്‍ തവണ സിംബാബ്‌വെയ്‌ക്ക് വേണ്ടി ടെസ്റ്റില്‍ അഞ്ചു വിക്കറ്റ് നേടിയ ബൗളറെന്ന റെക്കോര്‍ഡും സ്ട്രീക്കിന് സ്വന്തം. സിംബാബ്‌വെയ്‌ക്ക് വേണ്ടി 65 ടെസ്റ്റ് മത്സരങ്ങളും 189 ഏകദിനങ്ങളും അദ്ദേഹം കളിച്ചു. 4933 റണ്‍സും 455 വിക്കറ്റുകളും സ്ട്രീക്ക് സ്വന്തമാക്കിയിട്ടുണ്ട്.