ഇടുക്കി: ഒരുനാടിനെ മണിക്കൂറുകള്‍ ഇരുട്ടിലാക്കി കെഎസ്ഇബി ജീവനക്കാരുടെ വിനോദയാത്ര. ഇടുക്കിയിലെ പീരുമേട്ടില്‍ 16 മണിക്കൂറിലധികം വൈദ്യുതി മുടങ്ങി. സംഭവത്തില്‍ വകുപ്പ്തല അന്വേഷണം പ്രഖ്യാപിച്ചിട്ടുണ്ട്. പീരുമേട് അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ക്കാണ് അന്വേഷണ ചുമതല.കെഎസ്ഇബി ഉദ്യോഗസ്ഥരടക്കമുള്ള ജീവനക്കാരാണ് കൂട്ടത്തോടെ അവധിയെടുത്ത് വിനോദയാത്രയ്‌ക്കു പോയത്.
ഇടുക്കിയില്‍ യെല്ലോ അലര്‍ട്ട് പ്രഖ്യാപിച്ചിരുന്ന വെള്ളിയാഴ്‌ച്ച ഉച്ച കഴിഞ്ഞ് പീരുമേട്ടില്‍ കനത്ത മഴയെത്തുടര്‍ന്ന് വൈദ്യുത പോസ്റ്റുകള്‍ നിലപതിച്ചും ലൈനുകള്‍ പൊട്ടിയും വൈദ്യുതി വിതരണം പൂര്‍ണമായി തടസപ്പെട്ടിരുന്നു. ദുരന്ത നിവാരണ പ്രവര്‍ത്തനങ്ങള്‍ ഏകോപിപ്പിക്കേണ്ട താലൂക്ക് ഓഫീസ്, താലൂക്ക് ആശുപത്രി, സബ് ജയില്‍, പൊലീസ് സ്റ്റേഷന്‍ എന്നിവിടങ്ങളിലെല്ലാം ഇരുട്ടിലായിരുന്നു.
ഓണം അവധി ആഘോഷിക്കാന്‍ പീരുമേട്ടിലെത്തിയ നൂറു കണക്കിന് സഞ്ചാരികളും ബുദ്ധിമുട്ടിലായി. പീരുമേട് ഫീഡറിന്റെ പരിധിയിലെ നാലായിരത്തോളം ഉപഭോക്താക്കളാണ് ജീവനക്കാരുടെ ഉല്ലായാത്ര മൂലം മണിക്കൂറുകളോളം ഇരുട്ടിലായത്. ഉദ്യോഗസഥര്‍ ഇതര സംസ്ഥാനത്തേക്ക് യാത്ര പോയത് ബോര്‍ഡില്‍ നിന്നു അനുവാദം വാങ്ങാതെയാണെന്നും ആക്ഷേപം ഉയര്‍ന്നിട്ടുണ്ട്.
സംഭവം സംബന്ധിച്ച് മണിക്കൂറുകള്‍ കഴിഞ്ഞിട്ടും വൈദ്യുതി എത്താത്തതിനെ തുടര്‍ന്ന് നാട്ടുകാര്‍ പോത്തുപാറയിലുള്ള സെക്ഷന്‍ ഓഫീസിലേക്കു വിളിച്ചു. എല്ലാവരും ടൂര്‍ പോയെന്നായിരുന്നു മറുപടി. പരാതികള്‍ വ്യാപകമായതോടെ രാത്രിയില്‍ വനിത സബ് എഞ്ചിനീയറുടെയും പ്രദേശവാസിയായ വണ്ടിപ്പെരിയാറിലെ സബ് എന്‍ജീനിയറുടെയും നേതൃത്വത്തില്‍ തകരാര്‍ പരിഹരിക്കാന്‍ ശ്രമിച്ചെങ്കിലും ആവശ്യത്തിന് ജീവനക്കാരില്ലാത്തതിനാല്‍ ലൈനിലെ തകരാര്‍ കണ്ടെത്താനായില്ല. തുടര്‍ന്ന് ശനിയാഴ്‌ച്ച രാവിലെ 10 മണിയോടെ ആണ് വൈദ്യുതി ബന്ധം പുനഃസ്ഥാപിച്ചത്.
Comments