ന്യൂഡല്ഹി: ജ്ഞാന്വാപി മന്ദിരത്തില് ആര്ക്കിയോളജിക്കല് സര്വേ ഓഫ് ഇന്ത്യ (എഎസ്ഐ) സംഘം നടത്തുന്ന ശാസ്ത്രീയ സര്വേ പൂര്ത്തിയാക്കാന് എട്ടാഴ്ച കൂടി സമയം അനുവദിച്ച് വാരണാസി ജില്ലാ കോടതി. ജില്ലാ ജഡ്ജി എ.കെ വിശ്വേഷ് ആണ് മസ്ജിദ് മാനേജ്മെന്റ് കമ്മിറ്റിയുടെ എതിര്പ്പ് തള്ളി എഎസ്ഐയ്ക്ക് അധിക സമയം അനുവദിച്ചത്.
സര്വേ പൂര്ത്തിയാക്കാന് നാലാഴ്ചയാണ് ആദ്യം കാലാവധി അനുവദിച്ചിരുന്നെങ്കിലും ഈ സമയത്തിനകം സര്വേ പൂര്ത്തിയാക്കി റിപ്പോര്ട്ട് സമര്പ്പിക്കാന് കഴിയില്ലെന്ന് സര്ക്കാരിന് വേണ്ടി ഹാജരായ അഭിഭാഷകന് രാജേഷ് മിശ്ര വ്യക്തമാക്കിയിരുന്നു.
ഈ വാദം അംഗീകരിച്ചാണ് സര്വേ പൂര്ത്തിയാക്കാന് കൂടുതല് സമയം കോടതി അനുവദിച്ചത്. ഹിന്ദു ക്ഷേത്രമായ വിശ്വേശ്വര് മഹാദേവ ക്ഷേത്രം തകര്ത്ത് നിര്മ്മിച്ചതാണോ മസ്ജിദ് എന്ന് കണ്ടെത്തുകയാണ് സര്വ്വേയുടെ ലക്ഷ്യം.
സര്വ്വേയില് സമുച്ചയത്തിന്റെ ചുമരുകളിലും തൂണുകളിലും കൊത്തിയ ത്രിശൂലം, സ്വസ്തിക, മണി, പുഷ്പം തുടങ്ങിയ ഹിന്ദു ചിഹ്നങ്ങള് കണ്ടെത്തിയിരുന്നു . ഇത് സംഘം ക്യാമറകളില് പകര്ത്തിയിട്ടുണ്ട് .സര്വേയില്, ഗ്രൗണ്ട് പെനെട്രേറ്റിംഗ് റഡാര് (ജിപിആര്) വഴി, അടിത്തട്ട് വരെയ്ക്കും അന്വേഷണം നടത്തുന്നുണ്ട്.
Comments