ന്യൂയോർക്ക്: യുഎസ് ഓപ്പൺ ടെന്നീസ് വനിതാ വിഭാഗം കിരീടം ചൂടി അമേരിക്കയുടെ കൊക്കോ ഗോഫ്. ലോക ഒന്നാം നമ്പർ താരമായ ആര്യാന സബലങ്കയെ പരാജയപ്പെടുത്തിയാണ് 19കാരിയായ കൊക്കോയുടെ ആദ്യ ഗ്രാൻഡ് സ്ലാം കിരീട നേട്ടം. സെറീന വില്യംസിന് ശേഷം യുഎസ് ഓപ്പൺ കിരീടം സ്വന്തമാക്കുന്ന ആദ്യ കൗമാര താരമാണ് കൊക്കോ ഗോഫ്. സ്കോർ 2-6, 6-3, 6-2.
ആദ്യ സെറ്റുകളിൽ സബലങ്ക കൊക്കോ ഗാഫിന് കനത്ത വെല്ലുവിളി ഉയർത്തി. 6-2ന് ആദ്യ സെറ്റ് നേടിയ സബലങ്കയെ രണ്ടാം സെറ്റിൽ കൊക്കോ തിരിച്ചടിച്ചു. 6-3 നേടി മത്സരത്തിൽ ഒപ്പമെത്തി. മൂന്നാം സെറ്റിലും ആധിപത്യം തുടർന്ന കൊക്കോ രണ്ട് മണിക്കൂർ നീണ്ട പോരാട്ടത്തിനൊടുവിൽ കിരീടം സ്വന്തമാക്കുകയായിരുന്നു. ഇതോടെ താരം ലോകറാങ്കിംഗിൽ മൂന്നാം സ്ഥാനത്തേയ്ക്ക് ഉയരും.
നാളെയാണ് യുഎസ് ഓപ്പണിൽ പുരുഷ സിംഗിൾസ് ഫൈനൽ. നാലാം കിരീടം ലക്ഷ്യമിടുന്ന സെർബിയൻ ഇതിഹാസം നൊവാക് ജോകോവിച്ച് റഷ്യയുടെ ഡാനിൽ മെദ്വദേവിനോട് ആണ് ഏറ്റമുട്ടുക.
