ഹാങ്ചൗ; 19-മത് ഏഷ്യൻ ഗെയിംസിന് ഇന്ന് അനൗദ്യോഗികമായി ഇന്ന് തിരിതെളിയും. പുരുഷ ഫുട്ബോൾ, വോളിബോൾ, വനിതാ ക്രിക്കറ്റിന്റെ പ്രാഥമിക റൗണ്ട് മത്സരങ്ങൾക്കാണ് ഇന്ന് തുടക്കമാവുന്നത്. പുരുഷ ഫുട്ബോളിലും വോളിബോളിലും ഇന്ത്യയിന്ന് ആദ്യ മത്സരത്തിനിറങ്ങും. ഇന്ത്യൻ സമയം വൈകിട്ട് 5 മണിയ്ക്ക്് ആരംഭിക്കുന്ന ഫുട്ബോൾ മത്സരത്തിൽ ചൈനയാണ് ഇന്ത്യയുടെ എതിരാളികൾ. നായകൻ സുനിൽ ഛേത്രിക്ക് പുറമെ പ്രതിരോധത്തിലെ കരുത്ത് സന്ദേശ് ജിങ്കൻ, ചിങ്ലെൻസന സിങ് എന്നിവരാണ് ടീമിലെ സീനിയർ താരങ്ങൾ. മലയാളി താരം കെ.പി. രാഹുലും ടീമിലുണ്ട്. ചൈനക്കെതിരെ വിജയം ലക്ഷ്യമിട്ടാണ് ഛേത്രിയും സംഘവും ബൂട്ട് കെട്ടുക.
പുരുഷ വോളിബോളിൽ പൂൾ സിയിൽ കംബോഡിയയാണ് ഇന്ത്യയുടെ എതിരാളികൾ. ഇന്ത്യൻ സമയം വൈകിട്ട് 4.30നാണ് മത്സരം. പൂൾ എയിൽ കിർഗിസ്ഥാൻ ഖസാക്കിസ്ഥാനുമായും പൂൾ ബിയിൽ നേപ്പാൾ ബഹ്റിനുമായും പുൾ ഡിയിൽ പാകിസ്താൻ മംഗോളിയയുമായും പൂൾ ഇയിൽ തായ്ലൻഡ് ഹോങ്കോംഗുമായും എഫിൽ ജപ്പാൻ അഫ്ഗാനിസ്ഥാനുമായും ഇന്തോനേഷ്യ ഫിലിപ്പീൻസുമായും ആദ്യ മത്സരങ്ങളിൽ ഏറ്റുമുട്ടും. വനിതാ ക്രിക്കറ്റിൽ പ്രാഥമിക റൗണ്ട് മത്സരമാണ് ഇന്ന്. ആദ്യ കളിയിൽ ഇന്തോനേഷ്യ മംഗോളിയയെയും ഹോങ്കോംഗ് മലേഷ്യയെയും നേരിടും. സ്റ്റാർ സ്പോർട്സ് ചാനലുകളിലും സോണി ലൈവിലും ഏഷ്യൻ ഗെയിംസ് മത്സരങ്ങൾ കാണാം
