സുപ്രീംകോടതിയുടെ വ്യാജ ഉത്തരവുണ്ടാക്കി ജീവപര്യന്തം തടവുകാരനെ മോചിപ്പിച്ചു; പ്രതിഫലമായി പ്രതിയുടെ ഭാര്യയെ ലൈംഗികമായി ഉപയോഗിച്ചു; മുൻ ജയിൽ സൂപ്രണ്ട് അറസ്റ്റിൽ

ബംഗളൂരു: സുപ്രീംകോടതിയുടെ വ്യാജ ഉത്തരവ് ഉപയോഗിച്ച് ജീവപര്യന്തം തടവുകാരനെ ജയിലിൽ നിന്ന് മോചിപ്പിച്ച സംഭവത്തിൽ അന്വേഷണം നിർണായക വഴിത്തിരിവിൽ. 2018ൽ പരപ്പന അഗ്രഹാര സെൻട്രൽ ജയിലിന്റെ ചീഫ് സൂപ്രണ്ടായിരുന്ന എം. സോമശേഖറിനെ പൊലീസ് അറസ്റ്റ് ചെയ്തു. നിലവിൽ പ്രിസൺസ് ആൻഡ് കറക്ഷണൽ സർവീസസ് വകുപ്പിൽ ഡെപ്യൂട്ടി ഇൻസ്പെക്ടർ ജനറലായി പ്രവർത്തിക്കുന്ന സോമശേഖറിന് തടവുകാരൻ എസ്. ശങ്കറിന്റെ അനധികൃത മോചനത്തിൽ പങ്കുണ്ടെന്നാണ് പൊലീസിന്റെ സംശയം.

അന്വേഷണത്തിനിടെ ശങ്കറിന്റെ ഭാര്യ ഉന്നയിച്ച ഗുരുതര ആരോപണവും പുറത്തുവന്നു. ഭർത്താവിനെ ജയിൽ മോചിപ്പിക്കാൻ സോമശേഖർ സഹായിച്ചെന്നും ഇതിന് പകരമായി താൻ ലൈംഗിക ചൂഷണത്തിന് ഇരയായെന്നുമാണ് യുവതിയുടെ മൊഴി. ആരോപണം അന്വേഷണ സംഘം പരിശോധിച്ചുവരികയാണ്.

വ്യാജ ഉത്തരവ് ഉപയോഗിച്ച് മോചനം

2018 നവംബർ 13നാണ് ജീവപര്യന്തം തടവുകാരനായ ശങ്കർ പരപ്പന അഗ്രഹാര ജയിലിൽ നിന്ന് പുറത്തിറങ്ങിയത്. സുപ്രീംകോടതി ക്രിമിനൽ അപ്പീൽ അനുവദിച്ചെന്നും മോചിപ്പിക്കാമെന്നും വ്യക്തമാക്കുന്ന ഉത്തരവാണ് ഇതിനായി ജയിൽ അധികൃതർക്ക് മുന്നിൽ ഹാജരാക്കിയത്. തട്ടിക്കൊണ്ടുപോയി മോചനദ്രവ്യം ആവശ്യപ്പെട്ട കേസിലായിരുന്നു ശങ്കറിന് ഫാസ്റ്റ് ട്രാക്ക് കോടതി ജീവപര്യന്തം തടവും 10,000 രൂപ പിഴയും വിധിച്ചത്. ഉത്തരവിന് ഹാജരാക്കിയതിന്  പിഴത്തുക അടച്ചതിന് പിന്നാലെയാണ് ശങ്കർ ജയിലിൽ നിന്ന് പുറത്തിറങ്ങിയതെന്നും അന്വേഷണ സംഘം പറയുന്നു.

ജയിൽ ജീവനക്കാരനും അറസ്റ്റിൽ

ജയിൽ ജീവനക്കാരനായ എസ്. ശ്രീകാന്തിന്റെ സഹായത്തോടെയാണ് വ്യാജ ഉത്തരവ് തയ്യാറാക്കിയതെന്നാണ് പൊലീസ് സംശയിക്കുന്നത്. സംഭവസമയത്ത് കൺവിക്ട് പ്രിസണർ വിഭാഗത്തിൽ സെക്കൻഡ് ഡിവിഷൻ അസിസ്റ്റന്റായി ജോലി ചെയ്തിരുന്ന ശ്രീകാന്ത് നിലവിൽ ഫസ്റ്റ് ഡിവിഷൻ അസിസ്റ്റന്റാണ്.

വർഷങ്ങളോളം സംഭവം പുറത്തറിയാതെ തുടരുകയായിരുന്നു. പിന്നീട് സുപ്രീംകോടതി ഉത്തരവിന്റെ ആധികാരികത ചോദ്യം ചെയ്ത് ലഭിച്ച അജ്ഞാത സന്ദേശത്തെ തുടർന്നാണ് ജയിൽ അധികൃതർ അന്വേഷണം ആരംഭിച്ചത്. സംശയാസ്പദമായ രേഖ സുപ്രീംകോടതിയുടെ പരിശോധനയ്‌ക്ക് അയച്ചു. ഉത്തരവ് യഥാർഥമല്ലെന്ന് സ്ഥിരീകരിച്ചതിന് പിന്നാലെ ജയിൽ അധികൃതർ പരപ്പന അഗ്രഹാര പൊലീസിൽ പരാതി നൽകി.

തുടർന്ന് പൊലീസ് വ്യാജ ഉത്തരവ് തയ്യാറാക്കിയവരെയും അത് ജയിൽ അധികൃതർക്ക് കൈമാറിയവരെയും രേഖ പരിശോധിച്ച് മോചനത്തിന് അനുമതി നൽകിയവരെയും കേന്ദ്രീകരിച്ച് അന്വേഷണം ആരംഭിച്ചു.

ശങ്കറിന്റെ മൊഴിയിൽ സോമശേഖറിലേക്ക് അന്വേഷണം

അന്വേഷണത്തിന്റെ ഭാഗമായി ജൂണിൽ മൈസൂരുവിൽ നിന്ന് ശങ്കറിനെ പൊലീസ് അറസ്റ്റ് ചെയ്തു. ചോദ്യം ചെയ്യലിൽ ലഭിച്ച വിവരങ്ങളുടെ അടിസ്ഥാനത്തിലാണ്  ശ്രീകാന്തിനെ അറസ്റ്റ് ചെയ്തത്. തുടർന്നുള്ള അന്വേഷണത്തിലാണ് അന്നത്തെ ചീഫ് സൂപ്രണ്ടായിരുന്ന സോമശേഖറിന്റെ പങ്കും പൊലീസ് പരിശോധിച്ചത്. ശങ്കറിന്റെ ഭാര്യ നൽകിയ മൊഴിയും സോമശേഖറിനെതിരായ അന്വേഷണത്തിൽ നിർണായകമായെന്നാണ് പൊലീസ് പറയുന്നത്.

ഒക്ടോബർ നാലിനാണ് സോമശേഖറിനെ പരപ്പന അഗ്രഹാര പൊലീസ് അറസ്റ്റ് ചെയ്തത്. തുടർന്ന് കോടതിയിൽ ഹാജരാക്കിയ ഇയാളെ ഒക്ടോബർ ഒൻപത് വരെ പൊലീസ് കസ്റ്റഡിയിൽ വിട്ടു. ശങ്കറിന്റെ മോചനത്തിന് സഹായം നൽകുന്നതിന് പകരമായി ഭാര്യയെ സോമശേഖർ ലൈംഗികമായി ചൂഷണം ചെയ്തുവെന്ന ആരോപണവും പൊലീസ് അന്വേഷിക്കുന്നുണ്ട്. യുവതിയുടെ മൊഴി രേഖകൾ, ഇലക്ട്രോണിക് തെളിവുകൾ, മറ്റ് അന്വേഷണ വിവരങ്ങൾ എന്നിവയുമായി പരിശോധിച്ചുവരികയാണ്.