ലഖ്നൗ: പ്രധാനമന്ത്രി നരേന്ദ്രമോദിക്ക് ഇന്ത്യൻ ടീമിന്റെ ജഴ്സി സമ്മാനിച്ച് ക്രിക്കറ്റ് ഇതിഹാസം സച്ചിൻ തെണ്ടുൽക്കർ. വരാണസിയിലെ അന്താരാഷ്ട്ര ക്രിക്കറ്റ് സ്റ്റേഡിയത്തിന്റെ ശിലാസ്ഥാപന ചടങ്ങിലാണ് പ്രധാനമന്ത്രിക്ക് നമോ എന്ന് എഴുതിയ ജഴ്സി ക്രിക്കറ്റ് ഇതിഹാസം സമ്മാനിച്ചത്. യുപി മുഖ്യമന്ത്രി യോഗി ആദിത്യനാഥ്, ബിസിസിഐ പ്രസിഡന്റ് റോജർ ബിന്നി, ബിസിസിഐ വൈസ് പ്രസിഡന്റ് രാജീവ് ശുക്ല, ബിസിസിഐ സെക്രട്ടറി ജയ് ഷാ, മുൻ ഇന്ത്യൻ കോച്ച് രവി ശാസ്ത്രി, ക്രിക്കറ്റ് ഇതിഹാസം സുനിൽ ഗവാസ്കർ തുടങ്ങിയവരും ചടങ്ങിൽ പങ്കെടുത്തു.
കാഴ്ചപ്പാടിൽ വന്ന മാറ്റമാണ് കായികമേഖലയിൽ ഭാരതം മുന്നേറുന്നതിന്റെ കാരണം. കായിക താരങ്ങൾക്ക് അവരുടെ മികച്ച പ്രകടനം കാഴ്ചവെക്കാൻ കേന്ദ്ര സർക്കാർ സഹായിക്കുന്നു. ഇതിനുളള ഉത്തമ ഉദ്ദാഹരണമാണ് ഒളിമ്പിക്സ് പോഡിയം സകീം (ടോപ്സ്). ഇതിലൂടെ കായിക താരങ്ങൾക്ക് വിദേശ പരിശീലനം, അന്താരാഷ്ട്ര മത്സരങ്ങളിൽ പങ്കെടുക്കാനുളള സഹായങ്ങൾ, പരിശീലന ഉപകരണങ്ങൾ, കോച്ചിംഗ് ക്യാമ്പ് എന്നിവ ലഭിക്കുന്നു. ഇതിന് പുറമെ പ്രതിമാസ സ്റ്റൈപ്പന്റും ടോപ്സിലൂടെ കായികതാരങ്ങൾക്ക് കേന്ദ്രസർക്കാർ നൽകുന്നുണ്ട്.- പ്രധാനമന്ത്രി ചടങ്ങിൽ പറഞ്ഞു. ഏഷ്യൻ ഗെയിംസിൽ രാജ്യത്തെ പ്രതിനിധീകരിച്ച് പങ്കെടുക്കുന്ന താരങ്ങൾക്ക് പ്രധാനമന്ത്രി ആശംസകളും നേർന്നു.
‘കേന്ദ്ര സർക്കാരിന്റെ സ്മാർട്ട് സിറ്റി മിഷന്റെ സഹായത്തോടെ ബിസിസിഐയുടെ മേൽനോട്ടത്തിൽ നിർമ്മിക്കുന്ന ആദ്യത്തെ സ്റ്റേഡിയമാണ് വരാണാസിയിലേത്. ഉത്തർപ്രദേശിന് ഈ സമ്മാനം നൽകിയതിന് ബിസിസിഐക്കും പ്രധാനമന്ത്രി മോദിക്കും നന്ദി. യുപി മുഖ്യമന്ത്രി യോഗി ആദിത്യനാഥ് ഉദ്ഘാടന വേളയിൽ പറഞ്ഞു.
