നോയിഡ: ഇന്ത്യയിലെ ആദ്യത്തെ മോട്ടോജിപി അവസാനിച്ചു. ഗ്രേറ്റർ നോയിഡയിലെ ബുദ്ധ് ഇന്റർനാഷണൽ സർക്യൂട്ടിലാണ് മോട്ടോജിപി ഭാരത് നടന്നത്. സെപ്റ്റംബർ 22 മുതൽ 24 വരെയാണ് മോട്ടോജിപി നടന്നത്. മോട്ടോജിപി സീരീസിന്റെ 13-ാം റൗണ്ടായിരുന്നു ഇത്്. 2011നും 2013നും ഇടയിൽ മൂന്ന് ഫോർമുല വൺ റേസുകൾ ഇതേ വേദിയിൽ നടന്നിട്ടുണ്ട്. മൂന്ന് ദിവസങ്ങളിലായി മോട്ടോജിപി, മോട്ടോ 2, മോട്ടോ 3 എന്നീ മത്സരങ്ങളാണ് നടന്നത്. 41 ടീമുകളിൽ നിന്നുള്ള 82 റൈഡർമാർ മത്സരത്തിൽ മാറ്റുരച്ചത്.
മോട്ടോ ജിപി ആഗോള വാഹന വ്യവസായത്തെ സംബന്ധിച്ചിടത്തോളം വലിയ നേട്ടമാണെന്ന് ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞു. 25 കോടി ജനസംഖ്യയിൽ ഏറ്റവും കൂടുതൽ യുവാക്കൾ ഉള്ളത് ഉത്തർപ്രദേശാണ്. സ്പോർട്സ് വികസിപ്പിക്കാൻ യുപിയിൽ കൂടുതൽ സാധ്യതകളുണ്ട്. ഇതിനോടകം മോട്ടോജിപിയുടെ ഒരു ലക്ഷത്തിലധികം ടിക്കറ്റുകൾ വിറ്റഴിഞ്ഞു. അദ്ദേഹം കൂട്ടിച്ചേർത്തു.
മോട്ടോ ജിപി ആസ്വദിക്കാൻ എത്തിയതായിരുന്നു അദ്ദേഹം. റേസിംഗ് ബൈക്കിന് അടുത്ത് നിന്ന് ചിത്രങ്ങൾ എടുത്ത അദ്ദേഹം, ഹെൽമെറ്റിൽ ഓട്ടോഗ്രാഫ് നൽകുയും ചെയ്തു.