തലപുകച്ച് ഏക്ഗ്രതയോടെ കളിക്കേണ്ട കളികളിലൊന്നാണ് ചെസ്്. കണ്ണുകൾ രണ്ടും തുറന്നു വെച്ച് കൂർമതയോടെ ഈ ഗെയിം കളിക്കുന്നത് നിരീക്ഷിച്ചാൽ പോലും ഭൂരിഭാഗം ആളുകൾക്കും ഇത് ഒരു പരിധിയിലധികം മനസ്സിലാക്കാൻ കഴിയില്ല. ബോർഡിലെ ഓരോ കരുക്കളും പ്രത്യേക സ്ഥാനങ്ങളിൽ ക്രമീകരിച്ചാണ് കളി തുടങ്ങുന്നതെന്ന് നമുക്കറിയാം. എന്നാൽ കണ്ണുകൾ രണ്ടും അടച്ച് ഈ കരുക്കൾ ക്രമീകരിക്കാൻ നമുക്ക് സാധിക്കുമോ? പ്രയാസകരമായ ഈ കാര്യം നിമിഷനേരങ്ങൾ കൊണ്ട് സാധിച്ചെടുത്തിരിക്കുകയാണ് 10 വയസുള്ള ഒരു ചെസ്് പ്രേമി.
മലേഷ്യൻ സ്വദേശിയായ പുനിതമലർ എന്ന പെൺകുട്ടി വെറും 45.72 സെക്കൻഡിലാണ് കണ്ണടച്ച് ചെസ്് ബോർഡിൽ കരുക്കൽ കൃത്യമായി ക്രമീകരിച്ച് ഗിന്നസ് വേൾഡ് റെക്കോഡ് സ്വന്തമാക്കിയത്. സ്‌കൂൾ പരിസരത്തു നടത്തിയ മത്സരത്തിലാണ് ഇത്തരത്തിലൊരു വേറിട്ട പ്രകടനത്തിന് ഗിന്നസ് റെക്കോർഡ് കരസ്ഥമാക്കാൻ പെൺകുട്ടിക്ക് സാധിച്ചത്.
ചെസുമായി ബന്ധപ്പെട്ട ഒരു ഡോക്യുമെന്ററി കാണുന്നതിനിടെയാണ് ലോക റെക്കോർഡിനായി ശ്രമിക്കണമെന്ന ആശയം തന്നിൽ ഉദിച്ചതെന്നും ഇതിനായി പിതാവ് പരിശീലിപ്പിച്ചെന്നും പെൺകുട്ടി പറഞ്ഞു. എല്ലാദിവസവും അച്ഛന്റെ കൂടെയാണ് ചെസ് കളിക്കാറുണ്ടായിരുന്നതെന്നും 10 വയസുകാരി കൂട്ടിച്ചേർത്തു. കിഡസ് ഗോട്ട് ടാലന്റ് പോലുള്ള വിവിധ പരിപാടികളിൽ കഴിവുകൾ തെളിയിച്ച ഈ പെൺകുട്ടിയുടെ ഇഷ്ട വിഷയം ഗണിതമാണ്. കുടുംബമാണ് തന്റെ നേട്ടത്തിനു കാരണമെന്നും വലുതാകുമ്പോൾ ബഹിരാകാശ ശാസ്ത്രജ്ഞ ആകണെമെന്നാണ് ആഗ്രഹമെന്നും അവൾ വ്യക്തമാക്കി.
