ഒടിടി പ്ലാറ്റ്ഫോമുകൾ ഡിജിറ്റൽ ലോകത്തിൽ സജീവമായതോടെ ഉപഭോക്താക്കളുടെ എണ്ണത്തിൽ വൻ വർദ്ധനവാണുണ്ടായത്. ഉപഭോക്താക്കളുടെ എണ്ണത്തിൽ മുൻപന്തിയിൽ നിൽക്കുന്ന നെറ്റ്ഫ്ളിക്സ്, ഡിസ്നി ഹോട്ട്സ്റ്റാർ ഒടിടി പ്ലാറ്റ്ഫോമുകളാണ് ഇപ്പോൾ ഉപഭോക്താക്കളെ ഞെട്ടിപ്പിച്ച് രംഗത്തെത്തിയിരിക്കുന്നത്.
നെറ്റ്ഫ്ളിക്സിനു പിന്നാലെ പാസ്വേഡ് ഷെയറിംഗിനെതിരെ ഇപ്പോൾ ഡിസ്നി പ്ലസ് ഹോട്ട്സ്റ്ററും മുന്നോട്ടു വന്നിരിക്കുകയാണ്. നംവംബർ ഒന്നു മുതൽ അക്കൗണ്ട് ഷെയറിംഗുമായി ബന്ധപ്പെട്ട നിയന്ത്രണങ്ങൾ പ്രാബല്യത്തിൽ വരുമെന്ന വിവരം ഡിസ്നി പുറത്തുവിട്ടിരുന്നു. ഇതിനോടനുബന്ധിച്ച് കമ്പനി അടുത്തിടെ കനേഡിയൻ സബ്സ്ക്രൈബർമാരുടെ കരാറിൽ മാറ്റങ്ങൾ വരുത്തിക്കൊണ്ട് ഉപഭോക്താക്കൾക്ക് ഇ-മെയിൽ അയച്ചിരുന്നു. അക്കൗണ്ടുകൾ പങ്കിടുന്നതിനെതിരെ കർശന നിയന്ത്രണങ്ങൾ നടപ്പിലാക്കുമെന്നും ഇതു സംബന്ധിച്ച വിവരങ്ങൾ ഉടൻ പുറത്തുവിടുമെന്നുമായിരുന്നു ഉപഭോക്താക്കൾക്ക് അയച്ച ഇ-മെയിലിൽ പറഞ്ഞിരിക്കുന്നത്.
ഡിസ്നിയുടെ ഹെൽപ്പ് സെന്ററും ഇക്കാര്യം ചൂണ്ടിക്കാട്ടി അപ്ഡേറ്റ് ചെയ്തിട്ടുണ്ട്. ഉപയോക്താക്കൾ പാസ്വേഡുകൾ പങ്കിടുന്നുണ്ടോ എന്ന് ഡിസ്നിയ്ക്ക് കണ്ടെത്താനാകും. ഈ കാര്യത്തിൽ എന്തെങ്കിലും ലംഘനങ്ങൾ ശ്രദ്ധയിൽപെട്ടാൽ അക്കൗണ്ട് നിർത്തലാക്കാൻ കമ്പനിക്ക് അധികാരമുള്ളതായി ചൂണ്ടിക്കാട്ടുന്നു. ഈ മാറ്റങ്ങളെല്ലാം നവംബർ ഒന്നാം തീയതി മുതൽ കാനഡയിലുടനീളം പ്രാബല്യത്തിൽ വരും. ഇന്ത്യ ഉൾപ്പെടെയുള്ള മറ്റ് രാജ്യങ്ങളിലും കമ്പനി പുതിയ നയം വൈകാതെ നടപ്പിലാക്കുമെന്നാണ് പുറത്തു വരുന്ന റിപ്പോർട്ടുകൾ.