നടനും സംവിധായകനുമായ ഋഷഭ് ഷെട്ടി സംവിധാനം ചെയ്ത ചിത്രമായിരുന്നു കിർക്ക് പാർട്ടി. തെന്നിന്ത്യയ്ക്ക് പ്രിയങ്കരിയായ രശ്മിക മന്ദാനയും കന്നട യുവതാരം രക്ഷിത് ഷെട്ടിയും നായിക നായകൻമാരായി അരങ്ങേറ്റം കുറിച്ച ചിത്രം കൂടിയായിരുന്നു കിർക്ക് പാർട്ടി. ചിത്രത്തിലെ ഇരുവരുടെയും ജോഡി ആരാധകരും ഏറ്റെടുത്തിരുന്നു. സിനിമയ്ക്ക് ശേഷം ഇരുവരും പ്രണയത്തിലുമായി. രശ്മികയുടെ സൂപ്പർ ഹിറ്റായ ചിത്രം ഗീതാഗോവിന്ദത്തിന് ശേഷം ഇരുവരുടെയും വിവിഹ നിശ്ചയവും ആഘോഷപൂർവ്വം നടന്നു. എന്നാൽ അധികം വൈകാതെ തന്നെ ഇരുവരും വിവാഹ നിശ്ചയത്തിൽ നിന്ന് പിന്മാറുകയും ചെയ്തു.
ഇപ്പോഴിതാ ഒരു അഭിമുഖത്തിൽ രശ്മികയെ കുറിച്ച് രക്ഷിത് പറഞ്ഞ മറുപടിയാണ് ശ്രദ്ധേയമാകുന്നത്. ‘ഇരുവർക്കുമിടയിൽ ഇപ്പോഴും സൗഹൃദപരമായ അന്തരീക്ഷം ഉണ്ടോ എന്നായിരുന്നു ചോദ്യം. ചോദ്യത്തിന് രക്ഷിതിന്റെ മറുപടി ഇങ്ങനെ.. ‘ഞങ്ങൾ ഇടക്കിടെ മെസേജുകൾ അയക്കാറുണ്ട്. എന്നാൽ സ്ഥിരമായ കമ്യൂണിക്കേഷനുകളൊന്നും ഇല്ല. എന്റെ സിനിമകൾ റിലീസ് ചെയ്യുമ്പോൾ ബെസ്റ്റ് വിഷസ് അറിയിക്കും. രശ്മികയുടെ സിനിമകൾക്ക് ഞാനും ആശംസകൾ അറിയിക്കും. കൂടാതെ ജന്മദിനത്തിലും മറ്റ് ആഘോഷങ്ങളിലും ഞങ്ങൾ പരസ്പരം ആശംസകൾ കൈമാറും. രശ്മികയ്ക്ക് എപ്പോഴും വലിയ ഒരു സ്വപ്നങ്ങളുണ്ടായിരുന്നു. അവൾ അത് നേടിയെടുക്കുകയാണ്. അതിനുള്ള ക്രെഡിറ്റ് ആൾക്ക് നൽകണം’ എന്നായിരുന്നു രക്ഷിതിന്റെ മറുപടി.
777 ചാർളി എന്ന ചിത്രത്തിലൂടെയാണ് മലയാളികൾക്കിടയിലും രക്ഷിത് ഒരു സ്ഥാനം നേടുന്നത്. മലയാളിയായ കിരൺ രാജായിരുന്നു ചിത്രം സംവിധാം ചെയ്തത്. സപ്ത സാഗരദാച്ചേ എല്ലോ- സൈഡ് എ ആണ് രക്ഷിതിന്റെ പുതിയ ചിത്രം. അതേസമയം അനിമൽ, റെയിൻബോ, പുഷ്പ: ദി റൂൾ തുടങ്ങി ഒരുപിടി ചിത്രങ്ങളാണ് രശ്മികയുടേതായി അണിയറയിൽ ഒരുങ്ങുന്നത്.
