ഇലോൺ മസ്കിന്റെ ഉടമസ്ഥതയിലുള്ള സമൂഹമാദ്ധ്യമ പ്ലാറ്റ്ഫോമായ എക്സിൽ പുതിയ ഫീച്ചർ. വെബ്സൈറ്റിൽ ലിങ്കുകൾ പ്രദർശിപ്പിക്കുന്നതിലാണ് മാറ്റം വരുത്തിയിരിക്കുന്നത്. പോസ്റ്റുകൾ കൂടുതൽ മെച്ചപ്പെട്ട രീതിയിൽ ദൃശ്യമാക്കുന്നതിനായാണ് പുതിയ മാറ്റം.
പുതിയ ഫീച്ചർ അനുസരിച്ച് ഒരു വാർത്താ വെബ്സൈറ്റിൽ നിന്നുള്ള വാർത്തകൾ എക്സിൽ പങ്കുവെയ്ക്കുകയാണെങ്കിൽ വാർത്തയുടെ തലക്കെട്ട് കാണിക്കില്ല. പകരം ഒരു ചിത്രം മാത്രമാകും കാണിക്കുക. ട്വിറ്ററിൽ ഒരു ചിത്രം പങ്കുവെയ്ക്കുമ്പോൾ എങ്ങനെയാണോ ഇതിന് സമാനമായിരിക്കും ഇതും. ഉപയോക്താവ് പങ്കുവെയ്ക്കുന്ന കുറിപ്പാകും പോസ്റ്റിന്റെ ക്യാപ്ഷനായി കാണുക. കൂടാതെ ചിത്രത്തിന്റെ ഇടത് ഭാഗത്തിന് താഴെയായി വെബ്സൈറ്റിന്റെ ഡൊമൈനും പ്രദർശിപ്പിച്ചിട്ടുണ്ടാകും.
വായനക്കാർ ഈ ലിങ്കിൽ ക്ലിക്ക് ചെയ്യുന്നതോടെ വാർത്ത വായിക്കാൻ സാധിക്കും. പുതിയ മാറ്റം സാധാരണ ചിത്രങ്ങളുമായി വേർതിരിച്ചറിയുന്നതിന് വെല്ലുവിളി സൃഷ്ടിക്കുന്നുണ്ട്. ബുധനാഴ്ചയാണ് പുതിയ സംവിധാനം അവതരിപ്പിക്കുന്നത്. ഐഒഎസ് ആപ്പിലും വെബ്സൈറ്റിലും ഈ മാറ്റം നിലവിൽ വന്നിട്ടുണ്ട്. എന്നാൽ പരസ്യങ്ങളുടെ ലിങ്കുകൾക്ക് ഈ മാറ്റം ബാധകമല്ല.