സമൂഹ മാദ്ധ്യമങ്ങളിൽ ഇപ്പോൾ ക്രിക്കറ്റിലെ ഇതിഹാസമായ മുൻ ക്യാപ്റ്റൻ മഹേന്ദ്രസിംഗ് ധോണിയുടെ വാർത്തകളാണ് നിറയുന്നത്. കൂൾ ലുക്കിലെത്തിയ ക്യാപ്റ്റൻ കൂളിന്റെ ചിത്രങ്ങളും, സൂപ്പർസ്റ്റാർ രാംചരണിനോടൊപ്പമുള്ള മഹിയുടെ ചിത്രങ്ങളും ഇതിനോടകം തന്നെ സമൂഹമാദ്ധ്യമങ്ങളിൽ വൈറലാണ്. ഇതിനു പിന്നാലെയാണ് ജിയോമാർട്ടിന്റെ പുതിയ ബ്രാൻഡ് അംബാസഡറായി ധോണിയെ നിയമിച്ച് റിലയൻസ് രംഗത്തെത്തിയിരിക്കുന്നത്. ഇതിന്റെ വാർത്തകളാണ് ഇപ്പോൾ സമൂഹമാദ്ധ്യമങ്ങളിലും ആരാധകർക്കിടയിലും ചർച്ചയാകുന്നത്.
തന്റെ പ്രിയപ്പെട്ടവരുടെ കൂടെയുള്ള ആഘോഷങ്ങൾ ഒഴിവാക്കിയാണ് ധോണി രാജ്യത്തിന് വേണ്ടി നീക്കിവെക്കുന്നത്. ഇതുമായി ബന്ധപ്പെട്ടു നടക്കുന്ന ജിയോ ഉത്സവ് ക്യാമ്പയിനിലാണ് റിലയൻസിന്റെ പുതിയ പ്രഖ്യാപനം. ജിയോമാർട്ടിന്റെ ബ്രാൻഡ് അംബാസഡറായി ധോണിയെ തിരഞ്ഞെടുത്തത് ഒരു മികച്ച തീരുമാനമാണെന്നും അതിൽ സന്തോഷിക്കുന്നെന്നും ജിയോമാർട്ടിന്റെ സിഇഒ സന്ദീപ് വരഗതി പറഞ്ഞു. ജിയോമാർട്ട് മുന്നോട്ടു വെയ്ക്കുന്ന മൂല്യങ്ങൾ മുറുകെ പിടിച്ച് ഇന്ത്യയിലെ ഡിജിറ്റൽ റീട്ടെയിൽ വിപ്ലവത്തെ പിന്തുണ്ക്കാൻ ഒപ്പമുണ്ടാകുമെന്ന് മഹേന്ദ്രസിംഗ് ധോണിയും അറിയിച്ചു.