യാത്രകൾ ഇഷ്ടപ്പെടാത്തവരായി ആരും ഉണ്ടാകില്ല. വലിയ തയ്യാറെടുപ്പുകൾ ഇല്ലാത്ത ഒരു ഉല്ലാസ യാത്രയാകും എല്ലാവരും ആദ്യം തിരഞ്ഞെടുക്കുക. കുടുംബത്തോടൊപ്പം ഒരു ഔട്ടിംഗോ കൂട്ടുകാർക്കൊപ്പമുള്ള ഒരു ചുറ്റിക്കറങ്ങലിനോ തിരഞ്ഞെടുക്കാവുന്ന ഒരിടം. അധികം ചിലവുകളൊന്നും ഇല്ലാതെ വളരെ ചെറിയൊരു ബഡ്ജറ്റിൽ യാത്രപോയാലോ..
കേരള തമിഴ്നാട് ബോർഡറിലായി തിരുവനന്തപുരം ജില്ലയ്ക്കും കന്യാകുമാരി ജില്ലയ്ക്കും ഇടയിലായിയുള്ള ഒരു മനോഹരമായ സ്ഥലമാണ് മാത്തൂർ. ഇവിടെ സ്ഥിതി ചെയ്യുന്ന ഒരു വിനോദ സഞ്ചാരകേന്ദ്രമാണ് മാത്തൂർ തൂക്കുപാലം അല്ലെങ്കിൽ തൊട്ടിപ്പാലം. പറളി നദിക്ക് കുറുകെയാണ് ഈ പാലം സ്ഥിതിചെയ്യുന്നത്. ബ്രിട്ടീഷ് ഭരണകാലത്ത് നിർമ്മിച്ച ഒരു അക്വാഡക്റ്റാണ് ഇത്. ഏകദേശം ഒരു കിലോമീറ്ററാണ് തൊട്ടിപ്പാലത്തിന്റെ നീളം.
പറളി ഗ്രാമത്തിലെ കൃഷി ഭൂമിയിലേയ്ക്കും മറ്റുമായി 1966- ലാണ് ഈ അക്വാഡേറ്റ് നിർമ്മിച്ചത്. പട്ടണംകാൽ കനാലിലെ ജലമാണ് അക്വാഡക്റ്റ് വഴി പറളിയിലേയ്ക്ക് എത്തിക്കുന്നത്. ഒരു കുന്നിൽ നിന്ന് മറ്റൊരു കുന്നിലേക്കാണ് പാലം നിർമ്മിച്ചിരിക്കുന്നത്. 28 കൂറ്റൻ തൂണുകളിലാണ് പാലം താങ്ങി നിർത്തിയിരിക്കുന്നത്. പാലത്തിന് ഏകദേശം 115 അടിയോളം ഉയരമുണ്ട്. എന്നാൽ ഇതിൽ കൗതുകകരമായ മറ്റൊരു കാര്യം കൂടിയുണ്ട്, പാലത്തിന്റെ തൂണുകളിൽ പലതും പ്രദേശത്തെ പാറകൾ തന്നെയാണ്. അക്കാലത്തെ 12. 90 ലക്ഷം രൂപ മുടക്കിയാണ് തൊട്ടിപ്പാലം പണിതത്.
വർഷങ്ങൾക്ക് ശേഷവും യാതൊരു തരത്തിലുള്ള കേടുപാടുകളുമില്ലാതെ പാലം നിലനിൽക്കുന്നത് ഇവിടെ എത്തുന്നവർക്ക് ഒരു അത്ഭുത കാഴ്ച തന്നെയാണ്. തൊട്ടിപ്പാലത്തിന്റെ ഒരു പ്രധാന സവിശേഷത എന്തെന്നാൽ, രണ്ട് അറകളായാണ് പാലം നിർമ്മിച്ചിരിക്കുന്നത്. ഇതിൽ ഒരു അറയിലൂടെ കൃഷി ഭൂമിയിലേയ്ക്കുള്ള വെള്ളം ഒഴുക്കിക്കൊണ്ടു പോകാനും മറ്റേത് ജനങ്ങൾക്ക് ഗതാഗതത്തിനും ഉപയോഗിക്കാൻ കഴിയുന്ന തരത്തിലുമാണ്. ഒരു വിനോദ സഞ്ചാര കേന്ദ്രമെന്നതിലുപരി ഈ പാലം ഇപ്പോഴും ഗ്രാമവാസികൾ അവരുടെ ഗതാഗത മാർഗ്ഗമായി തന്നെയാണ് ഉപയോഗിക്കുന്നത്.
സൗജന്യമായി സഞ്ചാരികൾക്ക് ഇവിടം സന്ദർശിക്കാവുന്നതാണ്. അക്വാഡക്റ്റിലൂടെയുള്ള യാത്ര വളരെ മനോഹരമാണ്. ഒരു വശത്ത് ഒഴുക്കികൊണ്ടു പോകുന്നകാഴ്ചയും കണ്ടുള്ള നടത്തം വളരെ മനോഹരമാണ്. എന്നാൽ മറുവശത്ത് നിന്ന് താഴേയ്ക്ക് നോക്കിയാലോ ആകാശത്തോളം ഉയരത്തിൽ നിൽക്കുന്നത് പോലെ തോന്നും. ഒന്ന് താഴേയ്ക്ക് നോക്കിയാൽ തീപ്പെട്ടി കൂട് പോലെ വണ്ടികളും മൊട്ടുസൂചി വലിപ്പം മാത്രം തോന്നിക്കുന്ന തരത്തിൽ ആളുകളെയും കാണാം.
തൊട്ടിപ്പാലം സന്ദർശിക്കുമ്പോൾ ഒരു ദിവസം മുഴുവൻ ചിലവഴിക്കാനുള്ള കാഴ്ചകൾ അവിടെ തന്നെയുണ്ട്. കുട്ടികൾക്കുള്ള പാർക്കും, മനോഹരമായ പൂന്തോട്ടവും എല്ലാം ഇവിടെ ഉണ്ട്. മുതിർന്നവർക്കും ചെറുപ്പക്കാർക്കും പെറളി നദിയിൽ ആർത്തുല്ലസിച്ച് ഒരു കുളിയും പാസ്സാക്കാവുന്നതാണ്. കുടുംബസമേതം ഇവിടെ എത്തുന്നവർക്ക് ഔട്ടിംഗിന് പറ്റിയ സ്ഥലമാണ് തൊട്ടിപ്പാലം.
തിരുവനന്തപുരം നഗരത്തിൽ നിന്ന് ഒന്നര മണിക്കൂർ യാത്രയാണ് മാത്തൂരിലേയ്ക്കുള്ളത്. ബസിൽ ഇവിടേയ്ക്ക് യാത്ര ചെയ്യുന്നവർക്ക് മാർത്താണ്ഡത്തെത്തിയ ശേഷം അവിടെന്നും ബസ് മാർഗ്ഗം തൊട്ടിപ്പാലത്ത് എത്താവുന്നതാണ്. സ്വന്തം വാഹനങ്ങളിൽ എത്തുന്നവരും മാർത്താണ്ഡത്തെത്തിയ ശേഷം ഇവിടേയ്ക്ക് യാത്ര ചെയ്യുക.