പത്തനംതിട്ട: അടൂർ അന്താരാഷ്ട്ര ചലച്ചിത്ര മേളയുടെ ഏഴാം പതിപ്പിന് ഒക്ടോബർ 13 ന് തിരശീല ഉയരും. 13,14,15 തീയതികളിലായി അടൂർ സ്മിത തിയേറ്ററിൽവച്ച് നടക്കുന്ന മേളയിൽ പ്രശസ്തരായ വനിതാ സംവിധായകരുടെ ചിത്രങ്ങൾ മാത്രമാണ് ഉൾപ്പെടുത്തിയിട്ടുള്ളത്. പ്രദേശിക-ലോക- ഇന്ത്യൻ സിനിമാ വിഭാഗങ്ങളിലായിട്ടാണ് ചലച്ചിത്ര പ്രദർശനം നടക്കുന്നത്. പ്രവേശന പാസ് മൂലം മാത്രമേ ജനങ്ങൾക്ക് മേളയിൽ പങ്കെടുക്കാനാവൂ.
ചലച്ചിത്ര മേളയോടനുബന്ധിച്ച് നടത്തിയ ഹ്രസ്വചിത്ര മത്സരവിഭാഗത്തിൽ തിരഞ്ഞെടുത്ത 12 ചിത്രങ്ങളുടെ പ്രദർശനം ഉണ്ടാവും. കൂടാതെ ലോക സിനിമാ വിഭാഗത്തിൽ ഏട്ട് ചിത്രങ്ങളും, ഇന്ത്യൻ സിനിമാ വിഭാഗത്തിൽ രണ്ടും മലയാള സിനിമാ വിഭാഗത്തിൽ രണ്ടും വീതം ചിത്രങ്ങളാണ് പ്രദർശിപ്പിക്കുക. മേളയുടെ രണ്ടാം ദിനത്തിൽ നടക്കുന്ന ഓപ്പൺഫോറത്തിൽ സിനിമാ-സാഹിത്യ മേഖലയിലെ പ്രമുഖർ പങ്കെടുക്കും.
ചലച്ചിത്ര സംവിധായകൻ ടി.വി ചന്ദ്രൻ 13 ന് വൈകിട്ട് മേള ഉദ്ഘാടനം ചെയ്യും. 15 ന് നടക്കുന്ന സമാപന സമ്മേളനം ഐ.എഫ്.എഫ്.കെ മുൻ ആർട്ടിസ്റ്റിക് ഡയറക്ടറും ചലച്ചിത്ര പ്രവർത്തകയുമായ ദീപിക സുശീലൻ ഉദ്ഘാടനം ചെയ്യും.
