ത്രെഡ്‌സിൽ എഡിറ്റ് ബട്ടൺ അവതരിപ്പിക്കാനൊരുങ്ങി മെറ്റ. ഫീച്ചർ ഇതിനോടകം തന്നെ കമ്പനി അവതരിപ്പിച്ചു കഴിഞ്ഞു. പോസ്റ്റ് പങ്കുവെച്ച് അഞ്ച് മിനിറ്റ് കഴിയുന്നതുവരെ എത്ര തവണ വേണമെങ്കിലും എഡിറ്റ് ചെയ്യാനാകുന്ന പുതിയ ഫീച്ചറാണ് എത്തുന്നത്. ഒരുപാട് വർഷത്തെ കാത്തിരിപ്പിനൊടുവിൽ ഉപയോക്തക്കളുടെ അഭ്യർത്ഥന മാനിച്ച് കഴിഞ്ഞ വർഷമാണ് എക്‌സിൽ ഇത്തരത്തിൽ ഒരു ഫീച്ചർ അവതരിപ്പിക്കുന്നത്.
എക്‌സിൽ ഒരു പോസ്റ്റ് എഡിറ്റ് ചെയ്തു കഴിഞ്ഞാൽ ഇതിന്റെ ഹിസ്റ്ററി കാണുന്നതിനുള്ള സംവിധാനമുണ്ട്. എന്നാൽ ത്രെഡ്‌സിൽ ഇത്തരത്തിൽ ഒരു സംവിധാനമില്ല. ഇത് ത്രെഡ്‌സിലെ എഡിറ്റ് ഫീച്ചർ ദുരുപയോഗം ചെയ്യുന്നതിന് ഇടയാക്കിയേക്കുമെന്ന വിമർശനവും ഉയരുന്നുണ്ട്. അതായത് ത്രെഡ്‌സിൽ ഒരു പോസ്റ്റ് പങ്കുവെച്ചതിന് ശേഷം ഇത് എന്തെങ്കിലും വിധത്തിൽ വൈറലാകുകയാണെങ്കിൽ ഈ പോസ്റ്റ് പിന്നീട് പൂർണമായും മാറ്റിക്കുറിക്കാൻ സാധിക്കും. ഇത് ആദ്യം പങ്കുവെച്ച പോസ്റ്റ് ഏതെന്ന് തിരിച്ചറിയാനും സാധിക്കില്ല.
പോസ്റ്റിന് മുകളിൽ വലത് ഭാഗത്തായി ത്രീ ഡോട്ട് ബട്ടനിൽ എഡിറ്റ് എന്ന ഓപ്ഷൻ കാണാം. ഇതിൽ ക്ലിക്ക് ചെയ്ത് പോസ്റ്റ് എഡിറ്റ് ചെയ്യാനാകും. ഇതിന് പുറമെ വോയിസ് ത്രെഡ്‌സ് എന്ന പേരിൽ മറ്റൊരു ഫീച്ചർ കൂടി ത്രെഡ്‌സ് അവതരിപ്പിച്ചിട്ടുണ്ട്. ഇതിലൂടെ ഉപയോക്താക്കൾക്ക് വോയിസ് മെസേജ് പോസ്റ്റായി പങ്കുവെക്കാനും സാധിക്കും. മറുപടിയും ശബ്ദമായി പങ്കുവെയ്‌ക്കാൻ സാധിക്കും. ഇതിന്റെ ക്യാപ്ഷൻ ഓട്ടോമാറ്റിക് ആയി എത്തുമെങ്കിലും ഇതും ആവശ്യമെങ്കിൽ എഡിറ്റ് ചെയ്യാൻ സാധിക്കും.
