ന്യൂഡൽഹി: പ്രധാനമന്ത്രി നരേന്ദ്ര മോദി രചിച്ച ഗർബോ ഗാനത്തെ അടിസ്ഥാനമാക്കിയുള്ള മ്യൂസിക് വീഡിയോ പുറത്തിറക്കി. നവരാത്രി ആഘോഷങ്ങൾക്ക് മുന്നോടിയായാണ് മ്യൂസിക് വീഡിയോ പുറത്തിറക്കിയത്. മൂന്ന് മിനിട്ടും 11 സെക്കന്റുമാണ് ഗാനത്തിന്റെ ദൈർഘ്യം. ഈ ഗാനം വർഷങ്ങൾക്ക് മുൻപ് താൻ രചിച്ചതാണെന്ന് പ്രധാനമന്ത്രി എക്സിൽ കുറിച്ചു.
നടനും നിർമ്മാതാവുമായ ജാക്കി ഭഗ്‌നാനിയുടെ മ്യൂസിക് ലേബലായ ജസ്റ്റ് മ്യൂസിക്കിന്റെ ബാനറിലാണ് ഗാനം അണിയിച്ചൊരുക്കിയത്. ഗായിക ധ്വനി ഭാനുശാലിയും ബനിഷ്‌ക് ബാഗ്ചിയും ചേർന്നാണ് ഗാനത്തിന് സംഗീതം നൽകി ആലപിച്ചിരിക്കുന്നത്. കുറച്ചു ദിവസങ്ങൾക്ക് മുൻപ് താൻ രചിച്ച ഗർബ ഗാനം നവരാത്രി ആഘോഷങ്ങൾ ആരംഭിക്കുന്ന ആദ്യ ദിവസം പുറത്തിറക്കുമെന്ന് പ്രധാനമന്ത്രി അറിയിച്ചിരുന്നു.
ഗാനം പുറത്തിറങ്ങിയതിന് പിന്നാലെ ഭാനുശാലിക്കും ബാഗ്ചിയ്‌ക്കും ജസ്റ്റ് മ്യൂസിക്കിന്റെ മറ്റ് അംഗങ്ങൾക്കും പ്രധാനമന്ത്രി നന്ദി പറഞ്ഞു. മ്യൂസിക് ലേബലിന്റെ യൂട്യൂബ് ചാനലിലാണ് ഗാനം പുറത്തുവിട്ടിരിക്കുന്നത്. ഇതിനോടകം ലക്ഷക്കണക്കിന് ആളുകളാണ് ഗാനം കണ്ടത്.
