മനം കുളിരും; ലോകത്തിലെ ഏറ്റവും മനോഹരമായ മയിലുകൾ

പക്ഷി വർ​ഗങ്ങളിൽ ഏറ്റവും ഭം​ഗിയുള്ളവയാണ് മയിൽ. പൊതുവെ മയിൽ എന്നു പറയുമ്പോൾ ആൺ മയിലിനെയാണ് പലരും ഓർക്കുക. ആൺമയിലിനും പെൺമയിലിനും രൂപത്തിൽ കാര്യമായ വ്യത്യാസമുണ്ട്. ആൺ മയിലുകൾക്ക് നീണ്ട വർണ്ണാഭമായ പീലികൾ ഉണ്ട്. ഇതാണ് മയിൽ എന്നു കേൾക്കുമ്പോൾ തന്നെ ആൺമയിലിനെ നാം മനസ്സിൽ സങ്കൽപ്പിക്കുന്നത്. പൊതുവെ ഇന്ത്യയിലും ആഫ്രിക്കയിലുമാണ് മയിലുകളെ ധാരാളമായി കണ്ടുവരുന്നത്. ഇന്ത്യൻ മയിലുകൾക്കാണ് ഏറ്റവും ഭം​ഗിയും. എന്നിരിക്കിലും, ലോകത്തിലെ ഏറ്റവും മനോഹരമായ മയിലുകളെ ഒന്ന് പരിചയപ്പെടാം.

ഇന്ത്യൻ മയിൽ

ലോകത്തിലെ ഏറ്റവും മനോഹരമായ മയിലാണ് ഇന്ത്യൻ മയിൽ. ഇന്ത്യൻ മയിൽ അല്ലെങ്കിൽ നീല മയിൽ (പാവോ ക്രിസ്റ്ററ്റസ്) ഫെസന്റ് കുടുംബത്തിലെ അം​ഗമാണ്. ലോകത്തിലെ ഏറ്റവും വർണ്ണാഭമായതും മനോഹരവുമായ മയിലുകളാണ് ഇന്ത്യൻ മയിൽ. ആണിന്, അതിശയകരമായ നീലയും പച്ചയും നിറത്തിലുള്ള തൂവലുകലാണ്. പെൺ മയിലുകൾക്ക്, മങ്ങിയ തവിട്ട് നിറവും ചാരനിറവുമാണ്. ഇന്ത്യ, ശ്രീലങ്ക, നേപ്പാൾ, ബംഗ്ലാദേശ് എന്നിവിടങ്ങളിലും തെക്കൻ ഏഷ്യയുടെ ഭൂരിഭാഗം പ്രദേശങ്ങളിലും വനങ്ങളിലും പുൽമേടുകളിലും ഇന്ത്യൻ മയിൽ കാണപ്പെടുന്നു.

വെളുത്ത മയിൽ

വെളുത്ത മയിൽ (പാവോ ക്രിസ്റ്ററ്റസ്) ഒരു മനോഹരമായ പക്ഷിയാണ്. പ്രായപൂർത്തിയായ ആമ്‍ മയിലിന് നല്ല വെളുത്ത നീളമുള്ള തൂവലും പീലികളുമാണ് ഉള്ളത്. പെൺ മയിലിന് വെളുത്തതും ചെറിയ ചാര-തവിട്ട് നിറമുള്ള തൂവലുകളാണ്. ഇന്ത്യയിലും ശ്രീലങ്കയിലുമാണ് മയിലുകളുടെ ജന്മദേശമെങ്കിലും ലോകത്തിന്റെ മറ്റു ഭാഗങ്ങളിലും ഇവ കാണപ്പെടാറുണ്ട്. വെളുത്ത മയിലുകൾക്ക് ആൽബിനിസമല്ല, ലൂസിസമാണ്. അതിന്റെ ചർമ്മത്തിലും കണ്ണുകളിലും കുറച്ച് നീല പിഗ്മെന്റേഷൻ ഉണ്ട്. എങ്കിലും, ഈ മയിലുകളെ കണാൻ ഭം​ഗിയാണ്.

മലയൻ മയിൽ ഫെസന്റ്

മലേഷ്യൻ പെനിൻസുലയിൽ മാത്രം കാണപ്പെടുന്ന ജംഗിൾഫൗൾ കുടുംബത്തിലെ ഒരു പക്ഷിയാണ് മലയൻ മയിൽ ഫെസന്റ്( Malayan Peacock Pheasant). ആൺ പക്ഷിക്ക് നീളമുള്ള വാലും വിശറി പോലുള്ള തൂവലുകളുമുണ്ട്. ശരീരം കറുത്ത നിറത്തിലാണ്. തൂവലിൽ നല്ല നീല നിറത്തിലുള്ള ചെറുതും വലുതുമായ പുള്ളികളും കാണാം. ചിറകിൽ മങ്ങിയ നിറമുള്ള പുള്ളികളാണ് പെൺ മയിലിന്. വനങ്ങൾക്കുള്ളിൽ താമസിക്കുന്ന ഇവയുടെ പ്രധാന ഭക്ഷണം ചെറു പ്രാണികൾ, പഴങ്ങൾ, വിത്തുകൾ എന്നിവയാണ്.

ഗ്രേ മയിൽ ഫെസന്റ്

ചാര നിറമുള്ളവയാണ് ​ഗ്രേ ഫെസന്റ്. ഫാസിയാനിഡേ എന്ന ഫെസന്റ് കുടുംബത്തിലെ ഒരു പക്ഷിയാണ് ഇവ. ഹിമാലയം മുതൽ തെക്കുകിഴക്കൻ ഏഷ്യ വരെ ഇത് കാണപ്പെടുന്നു. നീല-പച്ച നിറത്തിൽ പുള്ളികളുള്ള തൂവലാണ് ഇവയ്‌ക്ക്.

പച്ച മയിൽ(Green Peafowl)

തെക്കുകിഴക്കൻ ഏഷ്യയിലെ ഉഷ്ണമേഖലാ വനങ്ങളിൽ കാണപ്പെടുന്നവയാണ് പച്ച മയിൽ. വളരെ കുറച്ച് മാത്രമുള്ള പക്ഷിയാണിവ. ആൺ മയിലുകൾക്ക് നീളമേറിയതും വർണ്ണാഭമായതുമായ പച്ച പീലികളുണ്ട്. 1.3 മീറ്റർ (4.3 അടി) വരെ നീളം പീലികൾക്കും ഉണ്ടാകും. പെൺപക്ഷികൾ വളരെ ചെറുതാണ്.