ഫാഷൻ ഡിസൈനർമാർക്ക് പുതിയ സാധ്യതകളുടെ ലോകം തുറന്ന് അഡോബിയുടെ ഡിജിറ്റൽ ഡ്രസ്സ്. തൊട്ടാൽ മാറുന്ന ഡിസൈനുള്ള വസ്ത്രമാണ് അഡോബി പുതിയതായി സൃഷ്ടിച്ചിരിക്കുന്നത്. അഡോബിയുടെ മാക്സ് കോൺഫറൻസിനിടെ റിസർച്ച് സയന്റിസ്റ്റ് ക്രിസ്റ്റീൻ ഡിയർക് ആണ് പ്രോജക്ട് പ്രിംറോസ് എന്ന പുതിയ സാങ്കേതിക വിദ്യ അവതരിപ്പിച്ചത്.
പ്രിംറോസ് പ്രകാരം സൃഷ്ടിച്ചെടുത്ത വസ്ത്രം ധരിച്ചുവന്ന ക്രിസ്റ്റീൻ അവരുടെ ഡ്രസിൽ സ്പർശിച്ചുകൊണ്ടായിരുന്നു ഡിസൈൻ മാറ്റിയിരുന്നത്. തുടർന്ന് ഒരേ വസ്ത്രത്തിൽ തന്നെ വിവിധ ഡിസൈനുകൾ ദൃശ്യമാകുന്നതായിരുന്നു കാഴ്ച. നിശ്ചലമായ ഡിസൈനുകളും ചലനാത്മകമായ പാറ്റേണുകളും അവയിലുണ്ടായിരുന്നു. ഇത്തരത്തിൽ ഫ്ളക്സിബിൾ, ലോ-പവർ ഡിസ്പ്ലേകളാണ് അഡോബിയുടെ പ്രോജക്ട് പ്രിംറോസ്.
ഒറ്റ സ്പർശനത്തിലൂടെ വസ്ത്രത്തിന്റെ ഡിസൈനുകൾ മാറ്റുന്ന ക്രിസ്റ്റീനിന്റെ വീഡിയോയും ഇതിനോടകം സോഷ്യൽമീഡിയയിൽ വൈറലാണ്. അഡോബിയുടെ ഇന്ററാക്ടീവ് ഡ്രസ് ഇന്റർനെറ്റ് ലോകത്ത് തരംഗം സൃഷ്ടിക്കുന്നതിനൊപ്പം ഫാഷൻ ലോകത്ത് വലിയ വെല്ലുവിളികളും സാധ്യതകളുമാണ് ഉയർത്തുന്നത്.
വസ്ത്രത്തിലും ഫർണീച്ചറുകളിലും മറ്റ് ഉപരിതലങ്ങളിലും ടെക്നോളജിയെ ലെയർ ചെയ്യാൻ ഡിസൈനർമാർക്ക് സാധിക്കുമെന്ന് ക്രിസ്റ്റീൻ പ്രതികരിച്ചു. ഇഷ്ടപ്പെട്ട ഡിസൈനറിൽ നിന്ന് ഇഷ്ടമുള്ള ഡിസൈൻ ഡൗൺലോഡ് ചെയ്ത് ധരിക്കാൻ കഴിയുന്ന തരത്തിലുള്ള സാധ്യതകളാണ് പ്രോജക്ട് പ്രിംറോസ് തുറന്നുവെക്കുന്നത്.
