ന്യൂഡൽഹി: 69-ാമത് ദേശീയ ചലച്ചിത്ര പുരസ്കാര വിതരണം ഇന്ന് ഡൽഹിയിലെ വിജ്ഞാൻ ഭവനിൽ രാഷ്ട്രപതി ദ്രൗപദി മുർമു നിർവഹിക്കും. എട്ട് വിഭാഗങ്ങളിലാണ് മലയാള സിനിമ ദേശീയ പുരസ്കാരം നേടിയത്. മികച്ച മലയാള ചിത്രമായി ഹോം തിരഞ്ഞെടുത്തപ്പോൾ അതിലെ മികച്ച പ്രകടനത്തിന് ഇന്ദ്രൻസ് പ്രത്യേക ജൂറി പുരസ്കാരം സ്വന്തമാക്കി. നായാട്ട് എന്ന ചിത്രത്തിലൂടെ ഷാഹി കബീർ മികച്ച തിരക്കഥാകൃത്തിനുള്ള പുരസ്കാരം നേടി. കൂടാതെ മികച്ച പുതുമുഖ സംവിധായകനുള്ള പുരസ്കാരം മേപ്പടിയൻ എന്ന ചിത്രത്തിലൂടെ വിഷ്ണു മോഹൻ കരസ്ഥമാക്കി. കൃഷാന്ത് സംവിധാനം ചെയ്ത ആവാസവ്യൂഹമാണ് മികച്ച പരിസ്ഥിതി ചിത്രം.
ഈ വർഷത്തെ മികച്ച നടനുള്ള ദേശീയ ചലച്ചിത്ര പുരസ്കാരം പുഷ്പ എന്ന ചിത്രത്തിലെ അഭിനയത്തിലൂടെ അല്ലു അർജുൻ സ്വന്തമാക്കിയപ്പോൾ ഗംഗുബായ് എന്ന ചിത്രത്തിലെ അവിസ്മരണീയമായ പ്രകടനത്തിന് ആലിയഭട്ടും മിമി എന്ന ചിത്രത്തിലൂടെ കൃതി സനോനും മികച്ച നടിക്കുള്ള 69-ാമത് ദേശീയ ചലച്ചിത്ര പുരസ്കാരം സ്വന്തമാക്കി.
