ഒരു കാലത്ത് കുടുംബ പ്രേക്ഷകരുടെ പ്രിയപ്പെട്ട സിനിമകൾ എല്ലാം തന്നെ ജയറാം ചിത്രങ്ങളായിരുന്നു. എന്നാൽ പിന്നീട് താരത്തിന്റെ ചിത്രങ്ങൾ തുടരെ പരാജയപ്പെടാൻ തുടങ്ങി. നല്ല സിനിമകൾ ലഭിക്കുന്നില്ല എന്നതായിരുന്നു കാരണം. ഇതോടെ മലയാള സിനിമയിൽ നിന്നും താത്കാലികമായി താരം വിട്ടും നിന്നു. പക്ഷെ, തെലുങ്ക് അടക്കമുള്ള അന്യഭാഷ ചിത്രങ്ങളിൽ നിറ സാന്നിധ്യമായി താരം. ഇപ്പോഴിതാ, മലയാള ചിത്രങ്ങൾ എന്തുകൊണ്ട് ചെയ്യുന്നില്ല എന്ന് തുറന്നു പറയുകയാണ് ജയറാം. കന്നഡ സൂപ്പർ സ്റ്റാർ ശിവരാജ്കുമാർ നായകനായി എത്തുന്ന ‘ഗോസ്റ്റ്’ സിനിമയുടെ പ്രസ്മീറ്റിൽ സംസാരിക്കുകയായിരുന്നു താരം.
‘മലയാളത്തിൽ നല്ല സിനിമകൾ കിട്ടിയാൽ മാത്രമെ ചെയ്യുന്നുള്ളൂ. വളരെ ത്രില്ലിംഗായിട്ടുള്ള സിനിമ വന്നാൽ ചെയ്യാം എന്നായിരുന്നു ഞാൻ പറഞ്ഞിരുന്നത്. അതിനായി വെയിറ്റിംഗിലായിരുന്നു. ആ സമയത്താണ് മിഥുൻ മാനുവൽ വന്ന് ഒരു കഥ പറഞ്ഞത്. ഇനി അതിനേക്കാൾ മുകളിലൊരു സിനിമ വരാൻ വേണ്ടിയാണ് കാത്തിരിക്കുന്നത്. മറ്റ് ഭാഷകളിലൊക്കെയായിട്ട് 365 ദിവസവും ജോലി ഉണ്ട്. തെലുങ്കിൽ ശങ്കർ-രാം ചരൺ സിനിമ ചെയ്യുന്നുണ്ട്. നാനിയുടെ മൂവിയിൽ അഭിനയിച്ചിരുന്നു. ഇപ്പോൾ ഗോസറ്റ് മൂവി റിലീസ് ആകുന്നു. തുടക്കം മുതൽ കുടുംബ ചിത്രങ്ങിലൂടെയാണ് ഞാൻ വന്നത്. ഇപ്പോൾ മറ്റു ഭാഷകളിലും അത്തരം ചിത്രങ്ങൾ ലഭിക്കുന്നുണ്ട്’- ജയറാം പറഞ്ഞു.
എം.ജി ശ്രീനിവാസ് സംവിധാനം ചെയ്യുന്ന ഗോസ്റ്റ് ഒക്ടോബർ 19-നാണ് തിയേറ്ററുകളിൽ എത്തുന്നത്. ശിവരാജ്കുമാർ, ജയറാം എന്നിവരെ കൂടാതെ വിജയ് സേതുപതി, പ്രശാന്ത് നാരായണൻ, അർച്ചന ജോയ്‌സ് തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. സത്യന്‍ അന്തിക്കാടിന്‍റെ മകള്‍ എന്ന ചിത്രത്തിന് ശേഷം ജയറാമിന്‍റേതായി തിയറ്ററുകളിലെത്തുന്ന മലയാള ചിത്രം മിഥുന്‍ മാനുവല്‍ തോമസ് സംവിധാനം ചെയ്യുന്ന അബ്രഹാം ഓസ്‍ലര്‍ ആണ്. ഡിസംബറില്‍ ചിത്രം തിയറ്ററുകളിലെത്തും.
