സിനിമാ പ്രേമികൾ ഏറെ ആകാംക്ഷയോടെ കാത്തിരിക്കുന്ന ചിത്രമാണ് അരുൺ വർമ്മ സംവിധാനം ചെയ്യുന്ന ഗരുഡൻ. ബിജു മേനോനും സിദ്ദിഖും വർഷങ്ങൾക്ക് ശേഷം സുരേഷ് ഗോപിക്കൊപ്പം അഭിനയിക്കുന്നു എന്നതാണ് സിനിമയുടെ പ്രധാന പ്രത്യേകത. ഒരു ലീഗൽ ത്രില്ലർ ചിത്രമാണ് ഗരുഡൻ. മലയാള സിനിമയിലെ മികച്ച കൂട്ടുക്കെട്ട് വീണ്ടും ഒന്നിക്കുന്നു എന്നതും മിഥുൻ മാനുവൽ തോമസ് തിരക്കഥ ഒരുക്കുന്നു എന്നതും ഗരുഡന്റെ പ്രധാന ആകർഷണമാണ്. ഇപ്പോഴിതാ, സുരേഷ് ഗോപിക്കൊപ്പം അഭിനയിക്കുന്നതിന്റെ സന്തോഷം പങ്കുവെച്ചിരിക്കുകയാണ് നടൻ സിദ്ദിഖ്.
‘ഒരുപാട് കാലത്തിന് ശേഷമാണ് സുരേഷിനൊപ്പം അഭിനയിച്ചത്. ഇതിന് മുമ്പ് അഭിനയിച്ചത് ബഡാ ദോസ്തിലാണ്. ഒരു സമയത്ത് എന്നെ ഓടിച്ചിട്ട് ഇടിച്ചോണ്ടിരുന്ന ആളാണ്. ഞങ്ങൾ ഏതാണ്ട് ഒരേ സമയത്ത് സിനിമയിൽ വന്നതാണ്. രാജാവിന്റെ മകൻ എന്ന സിനിമ സുരേഷ് കഴിഞ്ഞതോടെ ഞാനും സിനിമയിലെത്തി. അന്ന് തൊട്ട് ഞങ്ങൾ ഒരുമിച്ച് അഭിനയിക്കുന്നതാണ്. ന്യൂഡൽഹിയുടെ സമയത്ത് നടന്ന കാര്യങ്ങളൊന്നും പറയാൻ പറ്റില്ല. അത്രയ്‌ക്ക് അടുപ്പവും സ്നേഹവുമുള്ള സുഹൃത്താണ് സുരേഷ്. അന്നും ഇന്നും ആ ബന്ധം അതേപടി നിലനിൽക്കുന്നു. സിനിമയിൽ നിന്ന് ഇടയ്‌ക്കിടക്ക് വിട്ടു മാറി നിൽക്കുമ്പോൾ മാത്രമാണ് ഞാൻ വഴക്കുണ്ടാക്കുന്നത്’.
’ഗരുഡൻ ഒരു പുതിയ അനുഭവമായിരിക്കും സമ്മാനിക്കുക. ഞങ്ങൾ അഭിനയിക്കാത്ത തരത്തിലുള്ള കഥാപാത്രങ്ങൾ കിട്ടുമ്പോഴും നല്ല കഥ ലഭിക്കുമ്പോഴുമൊക്കെയാണ് നമുക്ക് സിനിമയോട് ഒരു മോഹം തോന്നുന്നത്. ഇതിൽ ഒരു വക്കീൽ കഥാപാത്രമാണ്. നേരത്തെയും ഞാൻ വക്കീലായി അഭിനയിച്ചിട്ടുണ്ട്. പക്ഷെ, ഈ സിനിമയുടെ അവതരണം നമ്മളെ മോഹിപ്പിക്കുന്ന തരത്തിലാണ്. എന്തായാലും ഇത് ഒരു പുതിയ അനുഭവമായിരിക്കും’- സിദ്ദിഖ് പറഞ്ഞു.
