തിരുവനന്തപുരം: ശ്രീപത്മനാഭ സ്വാമിക്ഷേത്രത്തിലെ അല്പശി ആറാട്ട് ഘോഷയാത്രയോടനുബന്ധിച്ച് രാജ്യാന്തര വിമാനത്താവളത്തിലെ വിമാന സര്വീസുകള് അഞ്ച് മണിക്കൂര് നിര്ത്തിവെയ്ക്കും. തിരുവനന്തപുരം വിമാനത്താവളത്തിൽ തിങ്കളാഴ്ച വൈകുന്നേരം നാല് മണി മുതല് രാത്രി ഒന്പത് മണി വരെയാണ് നിയന്ത്രണം.
ഈ അഞ്ച് മണിക്കൂര് സമയത്തുള്ള ആഭ്യന്തര, രാജ്യാന്തര വിമാന സർവീസുകൾ പുനഃക്രമീകരിച്ചിട്ടുണ്ട്. വിവിധ വിമാനങ്ങളുടെ പുതുക്കിയ സമയ വിവരം അതത് വിമാന കമ്പനികളില് നിന്നും ലഭ്യമാകുന്നതാണ്.
തിരുവനന്തപുരം വിമാനത്താവളം 1932 -ൽ സ്ഥാപിതമായ കാലം മുതൽ പിന്തുടരുന്ന രീതിയാണിത്. എല്ലാ വർഷവും പരമ്പരാഗത ആറാട്ട് ഘോഷയാത്രയുടെ സമയത്ത് ഇത്തരത്തിൽ സർവ്വീസുകൾ നിർത്തിവെക്കാറുള്ളതാണ്. വർഷത്തിൽ രണ്ട് തവണയാണ് ഇത് നടക്കുന്നത്. മാർച്ചിനും ഏപ്രിലിനും ഇടയിലുള്ള പൈങ്കുനി ഉത്സവത്തിനും ഒക്ടോബർ, നവംബർ മാസങ്ങളിലുള്ള അല്പശി ഉത്സവത്തിനുമാണ് ഇത്തരത്തില് വിമാനത്താവളത്തിലെ റണ്വേ അടയ്ക്കുന്നത്.