തിരുവനന്തപുരം: ഹയർസെക്കൻഡറി ഗസ്റ്റ് അദ്ധ്യാപകരുടെ പ്രായപരിധി 56-ആക്കി ഉയർത്തി വിദ്യാഭ്യാസ വകുപ്പ്. പ്രായപരിധി 40-ൽ നിന്നും 56 ആക്കിക്കൊണ്ടുള്ള ഉത്തരവ് വിദ്യാഭ്യാസ വകുപ്പ് പുറത്തിറക്കി. മുമ്പ് ഹയർസെക്കൻഡറി സ്കൂളുകളിൽ ജനറൽ വിഭാഗത്തിലുള്ള അദ്ധ്യാപകരുടെ ഏറ്റവും ഉയർന്ന പ്രായപരിധി 40 വയസായിരുന്നു.
നിലവിൽ സ്പെഷ്യൽ റൂൾ പ്രകാരമുള്ള പ്രായപരിധിക്കുള്ളിലെ ഗസ്റ്റ് അദ്ധ്യാപകരെ ലഭിക്കാത്തതിനാൽ പഠിപ്പിക്കുന്നതിന് അദ്ധ്യാപകരില്ലാത്ത സാഹചര്യമാണെന്ന് പൊതുവിദ്യാഭ്യാസ ഡയറക്ടറുടെ റിപ്പോർട്ടും പുറത്തു വന്നിരുന്നു. ഹയർ സെക്കൻഡറി വിദ്യാർത്ഥികളുടെ പഠനം തടസ്സപ്പെടാതിരിക്കുന്നതിന് വേണ്ടിയാണ് പ്രായം പുനർ നിശ്ചയിച്ചിരിക്കുന്നതെന്ന് ഉത്തരവിൽ പറയുന്നു.
40 വയസ് കഴിഞ്ഞ ഗസ്റ്റ് അദ്ധ്യാപകരുടെ നിയമന ഉത്തരവുകൾ റീജിയണൽ ഡെപ്യൂട്ടി ഡയറക്ടർമാർ തള്ളുന്നതായി വ്യാപക പരാതി ഉയർന്നിരുന്നു. ഒ.ബി.സിക്ക് 43, എസ്.സി, എസ്.ടി വിഭാഗങ്ങൾക്ക് 45 വയസ്സ് എന്നിങ്ങനെയായിരുന്നു പ്രായപരിധി. ഇതിനാൽ തന്നെ ബി.എഡ് അടക്കമുള്ള എല്ലാ യോഗ്യതകളും നേടിയ ശേഷം വളരെ ചുരുങ്ങിയ കാലം മാത്രമാണ് അദ്ധ്യാപനം നടത്താൻ കഴിയുന്നുള്ളൂ എന്ന പരാതിയും ഉദ്യോഗാർത്ഥികളിൽ നിന്നും ഉയർന്നിരുന്നു.
